Тошкент шаҳридаги «Зарқайнар» галереясида ўтказилган Agro Food Forum 2017 халқаро конференцияси якунига етди. Форумга «Мева-сабзавотни қайта ишлаш технологияси ва озиқ-овқат хавфсизлиги» мавзу этиб танланди.
Бу йил форум нафақат Ўзбекистонда, балки хорижда ҳам кўплаб компаниялар эътиборини ўзига тортди. Унинг ишида FAM (Бельгия), Octofrost (Швеция), Cabinplant (Дания), OMIP (Италия), TOMRA (Бельгия), Visser (Голландия) каби ўндан ортиқ қишлоқ хўжалиги соҳасидаги етакчи компания иштирок этди.
Анжуман доирасида кичик ва ўрта бизнеснинг юзлаб вакиллари, фермерлар ва ускуналар етказиб берувчилар ўзларини қизиқтирган масалалар юзасидан фикр ва тажриба алмашди. BtoB шакли туфайли мутахассислар шериклар ва ускуналар етказиб берувчиларни топиш имкониятига эга бўлди.
Конференцияда мева-сабзавот маҳсулотлари сифатини ошириш, қайта ишлашни яхшилаш ва қадоқлаш усуллари, шунингдек, фермер хўжаликлари фаолиятини ривожлантириш муҳокама қилинди. Форум иштирокчилари замонавий ускуналарни танлаш, ўрнатиш ва фойдаланиш тажрибаси билан бўлишди, экспорт ҳажмини ошириш йўлларини кўриб чиқди.
GMG компанияси вакили озиқ-овқат маҳсулотлари ишлаб чиқариш жараёнларини механизациялаштирадиган замонавий ускуналар ҳақида батафсил ҳикоя қилиб берди. Чет эллик меҳмонлар сабзавот, мева ва бошқа агромаҳсулотлар сифатини яхшилаш, бошқа давлатларга экспорт ҳажмини оширишнинг янги усулларини тақдим этди. Компаниялар вакиллари форум қатнашчиларининг саволларига муфассал жавоб берди.
Тақдимотларда етиштирилган маҳсулотни махсус алгоритмлар ёрдамида таснифлаш учун ишлаб чиқилган инновацион компьютер дастурлари ва иловалардан фойдаланиш усуллари намойиш этилди.
Ташкилотчилар форумни ўтказишга ижодий ёндошди: меҳмонларни торли ансамбл қарши олди, танаффус чоғида уларнинг кайфиятини таклиф этилган кўзбойлағич кўтарди, бетакрор Севара Назархоннинг чиқиши эса кечанинг ёрқин якуни бўлди.
Эслатиб ўтамиз, мева-сабзавот маҳсулотларини қайта ишлаш бўйича Европа ускуналарини етказиб бериш соҳасида Марказий Осиёдаги энг йирик компаниялардан бири General Machinery Group (GMG) форум ташкилотчиси бўлди. Компания мутахассислари ҳар қандай мураккабликдаги ишлаб чиқариш линияларини тайёр ҳолга келтириб беради: бу керакли ускунани саралаб олиш ва ўрнатишдан тортиб, уни цехда ишга тушириш, синов режимида фойдаланиб кўриш ва кафолатли сервис хизматини кўрсатишгача бўлган жараёнларни ўз ичига олади. Шунингдек, компания кенг спектрдаги қишлоқ хўжалиги ва унга боғлиқ соҳа техникасини етказиб беради.
Форум қатнашчилари ҳикоя қилади
Симоне Заффоли, COMPAC компанияси (Янги Зеландия):— Мазкур форумга таклиф этишганида бундан жуда мамнун бўлдим. Ўзбекистон бозори тез ривожланиб бормоқда ва ишлаб чиқаришни яхшилаш учун замонавий технологияларга эҳтиёж сезади. Форум ва унинг доирасидаги кўргазма хорижий компанияларга бўлажак буюртмачилар билан тўғридан-тўғри учрашиш учун ажойиб имконият ҳисобланади.
Алфонсо Cалифано, OMIP компанияси (Италия):
— Охирги йилларда Ўзбекистонда агромаҳсулот бозори ўта шиддат билан ўзгариб бормоқда. Масалан, илгари мевалар қуритилган бўлса, ҳозирда шок усулида музлатилмоқда. Сабзавот ва мевалар экспорти географияси кенгаймоқда: олдин Ўзбекистон уларни асосан Россияга етказиб берган бўлса, эндиликда Европа давлатларига экспорт ҳажми ошиб бормоқда. Айнан шу сабабли тажриба алмашиш учун бундай халқаро форумларни ўтказиш муҳим.
Абдулазиз Жўраев, AgroHouse компанияси (Ўзбекистон):
— Компаниямиз чет элда юқори сифатли уруғлар, минерал ўғитлар ва ўсимликларни ҳимоя қилиш воситаларини қидириш ва етказиб бериш билан шуғулланади. Биз бу каби форумларда аввалдан фаол иштирок этамиз. Фермерлар, агробизнес вакиллари билан учрашамиз ва натижада доимий, ишончли мижозларни топамиз.
Ботир Солиев, GMG компанияси (Ўзбекистон):
— Форумда озиқ-овқат мутахассислари дунёнинг етакчи компаниялари томонидан тақдим этилган мева-сабзавотни қайта ишлаш бўйича энг илғор технологиялар билан танишди. Тажрибали ходимлар ва малакали консултантлар иштирокчиларни қизиқтирган саволларга жавоб берди. Улар келгусида ҳам форумнинг барча қатнашчилари бизнеси оёққа туриши ва ривож топишида ёрдам беришга тайёр.
Реклама ҳуқуқи асосида
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)