Даврон Кабулов Ўзбекистон термасини бошқаришга тайёр. Натижа ҳозиргисидан ёмон бўлса, яшаб турган уйидан воз кечади

«Миллион»даги чиқишлари билан танилган бошловчи Даврон Кабулов Ўзбекистон миллий терма жамоасининг муваффақиятсизлигидан сўнг ўз Instagram саҳифасида таклиф билан чиқди. Унга кўра, агар бош жамоа Кабуловга ишониб топширилса ва мураббийнинг ишига аралашилмаса, бошловчи уни албатта Жаҳон чемпионатига олиб чиқади.

Мураббийлик тажрибам йўқлигини юзимга солишмаса, «қўнғироқлар» билан таркиб танлашга аралашишмаса, Ўзбекистон термасини Жаҳон чемпионатига олиб чиқа оламан. Текинга — пул керакмас. 4 йил ватаним учун ойликсиз ишлашга тайёрман.

«Бошловчилигингни қилсанг-чи» деган гапларга шошилманг. Термамизни шу вақтгача Саркисян, Мирсодиқов, Вега да Силва, Салков, Непомняший, Абрамов, Қосимов, Бабаян каби «тан олинган»лар бошқарди — олиб чиқолмади ЖЧга. Ҳеч нарса йўқотмайсиз: эплолмасам — олти марта чиқолмаган мундиалга еттинчи марта чиқмаган бўласиз. Ваъдамни устидан чиқсам — тарихда биринчи марта бўлади.

Жиддий айтяпман. Агар натижа олдингиларидан ёмон бўлса, яшаб турган уйимни ўртага тикишга тайёрман!

Даврон Кабулов