Профессионал боксда бунга қадар 10 та жанг ўтказиб, уларнинг барчасида рақибларини мағлуб этишга муваффақ бўлган ўзбекистонлик Қудратилло Абдуқаҳҳоров ўн биринчи ғалабасига эга чиқди. Бу ҳақда «Оламспорт» нашри хабар берди.
23 ёшли чарм қўлқоп устаси зимбабвелик Чарлез Манюичига қарши рингга кўтарилди. Жанг аслида 12 раунд давом этиши керак эди. Бироқ ўз вазн тоифасида Африка чемпионлигини қўлга киритган боксчи илк раунддаёқ мағлубиятини тан олди.
Абдуқаҳҳоровнинг биринчи жиддий зарбасидан кейиноқ ҳакам ҳисобни очишга мажбур бўлди. Чарлез эса белгиланган вақтда ўзига кела олмади.
Мазкур жангга Сингапур мезбонлик қилди. Ғалаба ўзбекистонлик боксчига WBC Silver чемпионлик камарини тақдим этди.
Профессионал боксдаги фаолиятини 2015 йилда бошлаган Қудратилло Абдуқаҳҳоров ўтказган 11 та жангининг 8 тасида рақибларини нокаутга учраштишга эришган.
Маълумот учун, зимбабвелик Чарлез Манюичи бунга қадар 23 та жанг ўтказган бўлиб, шуларнинг 20 тасида зафар қучган, 1 та жангни дуранг билан якунлаб, 2 тасини бой берганди.
Изоҳ (0)