Ўтган йил охирида кутилмаганда ҳукумат раҳбари лавозимидан истеъфо берган Янги Зеландия собиқ бош вазири Жон Ки парламентни ҳам яқин ҳафталар мобайнида тарк этади. Бу ҳақда «ТАСС» хабар бермоқда.
Жон Ки катта сиёсатдан узил-кесил кетишига умумий сайловларгача 6 ойдан ошиқ муддат мобайнида вакили қандайдир сабабларга кўра ўз мажбуриятларини бажаролмайдиган округда қўшимча сайловлар ўтказилишини кўзда тутувчи мамлакат конституцияси халақит бераётган эди.
Янги Зеландияда парламент сайловлари 23 сентябрга мўлжалланган, шу тариқа собиқ бош вазир вакил бўлган Ҳелленсвилл округида қўшимча сайловлар ўтказилиши талаб этилмайди.
55 ёшли Жон Ки мамлакат тарихига Янги Зеландияни глобал молиявий инқироз даврида муваффақиятли бошқарган етакчи ва раҳбарлиги остида партияси сайловларда ютқазмаган сиёсатчи сифатида киради.
Жон Ки катта сиёсатдан кетиш ҳақидаги қарорини шахсий сабаблар билан изоҳлади, бироқ уларни ошкор этмасликни маъқул кўрди.
Изоҳ (0)