Ўзбекистон Республикаси Олий Мажлиси Сенатида Мудофаа ва хавфсизлик масалалари қўмитаси томонидан ташкил этилган «Ёшларни чақирувга қадар бошланғич тайёрлаш ҳамда муддатли ҳарбий хизматни ўтаган ҳарбийларни олий ҳарбий таълим муассасаларига ўқишга қабул қилишнинг долзарб масалалари» мавзусида давра суҳбати бўлиб ўтди. Бу ҳақда Сенат ахборот хизмати хабар бермоқда.
Тадбирда сенаторлар, мудофаа, ички ишлар, олий ва ўрта махсус таълим вазирликлари, Миллий хавфсизлик хизмати, тегишли ҳарбий таълим муассасалари, Давлат тест маркази, жамоат бирлашмалари ва оммавий ахборот воситалари вакиллари иштирок этди.
Муҳокама чоғида сенаторлар қайд этганларидек, Ўзбекистон Республикаси Президентининг 2017 йил 24 январда қабул қилинган «Ўзбекистон Республикасининг Қуролли Кучларини янада ислоҳ қилиш ва ривожлантириш вазифаларини амалга ошириш бўйича чора-тадбирлар дастури тўғрисида»ги Қарорида ҳамда ушбу ҳужжат билан тасдиқланган тегишли Дастурда ҳарбий кадрларни тайёрлаш тизимини ва тегишли норматив-ҳуқуқий ҳужжатларни янада такомиллаштириш вазифаси қўйилди.
Ушбу ҳужжатларда олий ҳарбий билим юртларига кириш учун номзодларни танлаш талабларини ошириш, коллеж ва лицейлар фаолиятини самарали ташкил этишга доир зарур ташкилий-техник ва бошқа чора-тадбирлар мажмуини белгилаш ҳамда рўёбга чиқариш назарда тутилган. Коллеж ва лицейлар зиммасига олий ҳарбий билим юртларига кириш учун номзодларни тайёрлаш бўйича қўшимча вазифалар юкланган.
Юқорида қайд этилган вазифалар ижросини таъминлаш ёшларни чақирувга қадар бошланғич тайёрлаш ҳамда муддатли ҳарбий хизматни ўтаган ҳарбийларни олий ҳарбий таълим муассасаларига ўқишга қабул қилиш тизимининг амалдаги механизмларини такомиллаштириш масалаларига доимий эътибор қаратишни талаб қилиши тадбир иштирокчилари томонидан таъкидлаб ўтилди.
Иштирокчилар фикрича, ҳарбий таълим жараёнига ўқитишнинг замонавий усуллари ва технологияларини жорий этиш, ҳарбий таълим муассасаларида ўқишга муносиб бўлган иқтидорли ва қобилиятли ёшларни эрта аниқлаб, танлаб олиш орқали саралаш сифатини ошириш ҳамда шу мақсадда ҳар бир минтақада 2-3 касб-ҳунар коллежи ва лицейини белгилаб олиш долзарб вазифа ҳисобланади.
Мониторингнинг кўрсатишича, Хоразм, Қашқадарё, Жиззах вилоятларидаги таълим муассасаларида чақирувга қадар бошланғич тайёрлашнинг ўқув-моддий базаси савияси етарли эмас. Ушбу таълим муассасаларида чақирувга қадар бошланғич тайёрлаш бўйича режалаштирилган тадбирлар ўз вақтида ўтказилмаган ва мавжуд салоҳиятдан етарли даражада фойдаланилмаган. «Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)