Jeonbuk технопарки директори Ли Ян Чун раҳбарлигидаги Жанубий Корея делегацияси Тошкент шаҳридаги Инҳа университети (IUT) раҳбарияти билан музокаралар ўтказди. Бу ҳақда ўқув юрти матбуот хизмати хабар бермоқда.
IUT биринчи проректори, профессор Чо Ву Суг меҳмонларга ахборот технологиялари соҳасида мутахассислар тайёрлайдиган Ўзбекистон—Корея университети фаолияти, ўқитувчи ҳамда талабалар учун яратилган шароитлар, ўқув дастури тўғрисида батафсил маълумот берди.
Ли Ян Чун Jeonbuk технопарки фаолияти тақдимотини ўтказди. Технопарк 2013 йилда ташкил этилган бўлиб, унда турли илмий-тадқиқот лабораториялари ҳамда ишлаб чиқариш компаниялари фаолият кўрсатади.
Jeonbuk технопарки раҳбарлигидаги консорциум қишлоқ хўжалиги техникасини лойиҳалаш бўйича R&D марказини яратиш лойиҳасини амалга ошириши кўзда тутилган. Лойиҳа доирасида Корея томони ускуналар ва дастурий таъминотларни етказиб беради, маҳаллий мутахассисларни ўқитади.
Музокаралар давомида томонлар мазкур лойиҳани амалга оширишга университет талабаларини жалб этиш масаласини муҳокама қилди. Шунингдек, бошқа соҳаларда, жумладан, тадқиқотлар ўтказиш ва тажриба алмашиш бўйича ҳамкорлик имкониятлари ҳам кўриб чиқилди. «Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)