Тошкент шаҳрининг Мирзо Улуғбек тумани ҳокимлиги «аҳоли билан яқин ҳамкорликда фоалият олиб бориш мақсадида» Facebook ижтимоий тармоғида ўз саҳифасини очди. Бу ҳақда «Газета.uz» хабар бермоқда.
Саҳифа туман ҳокими Шерзод Кудбиев ташаббуси билан очилган. «Ахир ҳокимият маҳаллий аҳамиятга эга масалаларни самарали ҳал қилиши учун аҳолига максимал яқин бўлиши керак», — дейилади саҳифадаги хабарда.
Мулоқотнинг янги шакли ёрдамида туман ҳокимлиги нафақат ўз фаолияти ҳақида ахборот беришни, балки аҳолининг бу фаолият ҳақидаги фикрларини ўрганишни ҳам мақсад қилган. «Бизнинг фикримизча, ижтимоий тармоқларда саҳифалар яратиш, Сиз билан ҳамкорликнинг энг самарали усулларидан бири ҳисобланади», — дейилади хабарда.
Ҳокимлик илк маротаба «масъулиятни ўз зиммасига олган ҳолда», фаолияти тўғрисидаги ахборотдан аҳолининг фойдаланишини таъминлаш мақсадида ушбу «пилот лойиҳаси»ни амалиётга татбиқ этар экан, «бироз сабрлироқ бўлишни» сўраган.
«Мурожаатларингизга имкон қадар тез жавоб қайтаришга ваъда берамиз. Биз учун туман ҳокимлиги фаолияти ҳақида фикрингизни билиш жуда муҳим ва қизиқарли эканини унутманг», — дейилади саҳифадаги хабарда.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)