Қуръа Ўзбекистон термасини Осиё чемпионатига чиқиш учун БАА ва Ливанга рақиб қилди

22 ёшгача бўлган футболчилардан ташкил топган Ўзбекистон терма жамоаси 15 июль куни Осиё чемпионатининг саралаш турниридаги иштирокини бошлайди.

Бугун — 17 март куни ОФК штаб-квартирасида саралаш ўйинларига қуръа ташлаш маросими бўлиб ўтди. Унда 40 та мамлакат ғарб ва шарқ минтақаларига ажратилди. Якунда саралаш ўйинларига мезбонлик қиладиган мамлакатлар номига ойдинлик киритилди.

Қуръага кўра, Жасур Абдураимов бошчилик қилаётган Ўзбекистон терма жамоаси Осиё чемпионатининг финал босқичига чиқиш учун «D» гуруҳида кураш олиб боради. Рақиблар: БАА, Ливан ҳамда Непал. Саралашга БАА мезбонлик қилади.

Регламентга кўра, ўз гуруҳларида 1-ўринни эгаллаган термалар финал босқичига чиптани қўлга киритади. Шунингдек, 5 та энг олди 2-ўрин эгалари ҳам миссияни уддалаган бўлиб чиқади. 16-жамоа Осиё чемпионатининг мезбони Хитой бўлади. Чин мамлакатидаги турнир 2018 йилнинг 9 январь санасида старт олади.

Қизиқ томони, саралаш турнирида мезбон Хитойнинг ўзи ҳам иштирок этади. Агар терма жамоа ўз гуруҳида 1-ўринни эгаллайдиган бўлса, у ҳолда энг яхши 6 та 2-ўрин эгаларида қитъа биринчилигида иштирок этиш имконияти бўлади.

Маълумот учун, Осиё чемпионати U22 сўнгги бор 2016 йилнинг январида бўлиб ўтганди. Унга Ўзбекистон термасини Самвел Бабаян бошлаб борган ва гуруҳдан чиқа олмаган. Шу тариқа Рио—2016 Олимпиадаси чиптаси бой берилган.

2018 йилги турнир Олимпиада учун саралаш вазифасини ўтамайди. 2020 йилгиси эса Токио—2020 учун саралаш ҳисобланади.