«Лестер» дарвозабони Шмейхель тарихга кирди. «Ювентус» ҳужумчиси Дибала охирги 4 та голини пенальтидан урди

Европа Чемпионлар лигасининг плей-оффида «Севилья»га қарши икки ўйин ўтказган «Лестер» дарвозабони Каспер Шмейхель уларнинг ҳар бирида биттадан пенальти қайтаришга муваффақ бўлди. Бунга ҳозирча ҳеч бир дарвозабон муваффақ бўла олмаганди.

Табиийки, икки пенальтини кўкка совурган «Севилья» турнирни тарк этди. Биринчи учрашувда Хоакин Коррея 11 метрлик жарима зарбасини ноаниқ амалга оширган бўлса, иккинчисида Стивен Н’Зонзи Шмейхель билан дуэлда енгилди.

Туриннинг «Ювентус» клуби эса Чемпионлар лигасидаги юришини давом эттирадиган бўлди. Клуб ҳужумчиси Пауло Дибала «Порту»га қарши кечган жавоб ўйинида пенальтини аниқ амалга оширди.

Бу Дибаланинг кетма-кет тўртинчи бор пенальтидан гол уриши бўлди. Италия А сериясининг сўнгги турида «Ювентус» ўз майдонида «Милан»ни 2:1 ҳисобида мағлуб этганди. Ҳакам миланликлар дарвозасига 96-дақиқада пенальти қўйиб берганди.

Италия кубогида эса «Ювентус» «Наполи» устидан 3:1 ҳисобида зафар қучган. Беллашувда ҳакам неаполликлар дарвозасига 2 та пенальти қўйганди.