Ўзбекистон Президенти Шавкат Мирзиёев Бухоро вилоятига ташрифи доирасида ердан унумли фойдаланиш, тутзорлар барпо этиш бўйича янги лойиҳа тақдимотида қатнашди, деб ёзади ЎзА.
Давлат раҳбари мазкур соҳани янада ривожлантириш, тутзорларни кўпайтириш бўйича кўрсатмалар берди. Бу борадаги ишларни тизимли йўлга қўйиш мақсадида ташкил этилаётган «Ўзбекипаксаноат» уюшмасининг таркибий тузилмаси билан ҳам танишди.
«Ёшлар» телеканалининг янгиликлар дастурида айтилишича, «Ўзбекипаксаноат» уюшмаси лойиҳаси республика бўйича ипакчилик соҳасида яхлит занжирни яъни озуқа базасини кенгайтириш, ипак қуртини парваришлаш, хом пилла ишлаб чиқариш, уни қайта ишлаш ва экспортга чиқаришни ривожлантиришга қаратилган ягона тизимни ташкил қилишдан иборат.
2023 йилгача тизимда ташкил этиладиган корхона ва ташкилотлар бир қатор солиқ ва бошқа имтиёзларга эга бўлади.
Вилоятда аграр тармоқни янада ривожлантиришда ҳудуддаги касб-ҳунар коллежларида қишлоқ хўжалигининг биз янгидан ўзлаштираётган соҳалари бўйича мутахассислар тайёрлаш тизимини йўлга қўйиш керак, деди давлат раҳбари.
Изоҳ (0)