Тошкентдаги Ҳазрати Имом мажмуаси ҳудудида майсазорда юриш, скейтборд ва роликда учиш, велосипед ҳайдаш тақиқланди

Ўзбекистон мусулмонлар идораси ҳузуридаги Муқаддас қадамжоларни сақлаш ва обод этиш хайрия жамғармаси Ҳазрати Имом мажмуасидаги «Мўйи Муборак» мадрасаси — муқаддас Қуръони Карим жойлашган музейни зиёрат қилиш тартибини ишлаб чиқди. Бу ҳақда Ўзбекистон Туризмни ривожлантириш давлат қўмитаси ахборот хизмати хабар бермоқда.

Гид ва сайёҳлар учун тайёрланган тавсияларга кўра, «Мўйи Муборак» мадрасаси — муқаддас Қуръони Карим жойлашган музейга бир вақтнинг ўзида 40 нафаргача зиёратчи кириши мумкин, экскурсия вақти 20 дақиқадан ошмаслиги керак.

Музей ҳудудида баланд овозда гапириш, баҳслашиш, видео ёки фотога олиш мумкин эмас. Зиёратчи аёллар бошига рўмол ёки шарф ташлаб олишлари, кийимлари ҳам зиёрат талабида — меъёрдан ортиқ калта, тор ёки очиқ бўлмаслиги тавсия этилади.

Ҳазрати Имом мажмуаси ҳудудида эса чекиш, спиртли ичимликлар истеъмол қилиш, майсазорда юриш, гулларни узиш, скейтборд ва роликда учиш, велосипед ҳайдаш каби ҳаракатлар тақиқланади.

Музей сайёҳлик мавсумида — 1 мартдан 30 июнга қадар, шунингдек, 1 августдан 30 ноябргача шанба ва якшанба кунлари ҳам соат 9:00 дан 16:00 га қадар ишлайди.

«Дарё»нинг Telegram’даги расмий канали — @toshqindaryo’га аъзо бўлинг!