Сайёҳлар дунёнинг энг яхши ва ёмон аэропортларини аниқлаб берди

Сайёҳлар Финляндиянинг Хельсинки-Вантаа аэропортини дунёда энг яхши деб топди. Бу ҳақда Daily Mail хабар бермоқда. 

Финляндия пойтахти аэропорти eDreams халқаро туризм агентлиги 65 мингдан ортиқ сайёҳ фикрлари асосида тузилган ва тозалик, текшириш зоналари самарадорлиги, ресторан ва дўконлар мавжудлиги каби 10 кўрсаткични ўз ичига олувчи рўйхатни бошқарди. 

Иккинчи ва учинчи ўринларни Глазго (Буюк Британия) ва Цюрих (Швейцария) аэропортлари эгаллади. Кейинги ўринларда Германиянинг Мюнхен ва Франкфурт-Майндаги аэропортлари қайд этилди.

Шунингдек, сайёҳлар дунёнинг энг ёмон аэропортини ҳам аниқлаб берди: Берлин-Шёнефельд (Германия) шундай баҳога лойиқ кўрилди. Аксилрейтинг учлигига Лондоннинг Лутон ва Нью-Йоркдаги Ла-Гуардия аэропортлари ҳам кирди.