АҚШ конгресси NASA’нинг яқин беш йил давомидаги сиёсатини, шунингдек, агентликнинг 2017 молия йили учун бюджетини белгилаб берувчи қонунни қабул қилди. Ҳужжатни мамлакат президенти Дональд Трамп имзолаши кутилмоқда, деб ёзади Space News.
Қонун лойиҳасини вакиллар палатаси 7 март куни, сенат эса 17 февраль куни маъқуллаган эди. NASA’нинг 2017 молия йили учун мўлжалланган бюджети 19,5 миллиард долларни ташкил этади.
Беш йиллик режада 2030 йилларга мўлжалланган Марсга миссия (астронавтларни сайёрага қўндириш назарда тутилади)га тайёргарлик ишларини давом эттириш кўзда тутилган. Астероид бўлагини Ой атрофидаги орбитага олиб чиқиш бўйича АRМ лойиҳасини эса бекор қилиш таклиф этилмоқда.
Конгрессменлар, шунингдек, астронавтларни Халқаро космик станцияга етказиш бўйича Россиянинг хизматларига боғлиқликдан тезроқ озод бўлишни таклиф қилмоқда.
Бундан ташқари, Конгресс Юпитернинг муз ости океанида ҳаёт мавжудлиги тахмин этилаётган йўлдоши — Европага миссия бўйича ишларга расман старт берди.
Изоҳ (0)