Меҳнат вазирлиги вакиллари Польшада Ўзбекистон фуқароларини иш билан таъминлаш ва ҳуқуқларини ҳимоялаш масалаларини муҳокама қилди

Ўзбекистон Республикаси Меҳнат вазирлиги ва Польшанинг Tradma, HR Agensia, El-in, JP Construst компаниялари вакиллари Варшавадаги Ўзбекистон элчихонасида ҳамкорликнинг келгуси истиқболларини муҳокама қилди. Бу ҳақда «Дарё»га вазирлик матбуот хизмати маълум қилди.

Ўзбекистон делегацияси Лодзь ва Люблин вилоятлари губернаторлари билан ҳам тақдимот учрашувлари ўтказди. Ушбу вилоятларнинг биринчиси тўқимачилик, иккинчиси эса аграр соҳада Польшанинг етакчи ҳудудлари ҳисобланади. Меҳнат вазирлигининг Ташқи миграция масалалари агентлиги бошлиғи ўринбосари Х.Асамов учрашувлар давомида мезбонларни Ўзбекистоннинг таълим ва ихтисослаштирилган кадрлар тайёрлаш тизими билан таништирди.

Вилоятлар губернаторлари А.Багинский ва П.Чарнек қишлоқ хўжалиги, чорвачилик, тўқимачилик ва озиқ-овқат саноати соҳаларида малакали кадрлар танқислиги мавжуд эканлигини қайд этиб, бу йўналишда ҳамкорлик қилишга тайёр эканликларини билдирди. Шунингдек, Ўзбекистон фуқароларининг янги иш жойларида фаолиятларини бошлашлари учун бу жараённи тезлаштириш ва соддалаштиришга кўмак беришларини маълум қилди.

Ўзбекистон делегацияси Люблин бизнес клуби тадбиркорлари ва Tradma кадрлар агентлиги директори билан ўтказилган учрашувларда самарали ҳамкорликни янада мустаҳкамлашга келишиб олди.

Польша вакиллари келгусида малакали кадрларини ишга қабул қилиш билан чекланмай, Ўзбекистон бозорига инвестиция жалб қилиш мақсадида маҳаллий етакчи компанияларни жалб қилишларини билдирди.

Польшада меҳнат қилаётган Ўзбекистон фуқароларининг ҳуқуқларини ҳимоя қилиш музокараларнинг асосий мавзуси бўлди.