Ўзини Малайзияда ўлдирилган Ким Чон Намнинг ўғли деб атаётган йигитга тегишли видеомурожаат 7 март куни интернетда эълон қилинди. Ким Чон Нам КХДР етакчиси Ким Чен Иннинг акаси эди, деб ёзади Meduza.
40 сониялик роликда инглиз тилида гапираётган шахс ўзини «шимолий кореялик Ким Хан Соль, Ким оиласининг вакили» деб таништиради.
«Бир неча кун аввал менинг отам ўлдирилди, мен ҳозир онам ва синглим билан биргаман, (шу жойида овоз ўчириб қўйилган)... учун биз жуда миннатдормиз ва, умид қиламизки, тез орада ҳаммаси изга тушиб кетади», — дейди у.
Видеода йигит ўз паспортини кўрсатган, бироқ кўрсатилган ҳужжат саҳифаси монтаж ёрдамида қорайтириб қўйилган.
Видео қачон ва қаерда олингани номаълум. Ролик шу вақтгача номаълум бўлган Cheollima Civil Defense ташкилоти томонидан эълон қилинган бўлиб, ташкилот сайтида қайд этилишича, у «Ким Чон Нам оиласининг омон қолган аъзолари томонидан қилинган ҳимоя ҳақидаги шошилинч илтимосга жавоб қайтарган» ва «уларни хавфсиз жойга кўчирган» (айнан қаерга кўчиргани айтилмаган).
Ташкилот кўмак учун Голландия, Хитой, АҚШ ва «номи ошкор этилмаган тўртинчи мамлакат»га, шунингдек, шахсан Голландиянинг Кореядаги элчисига миннатдорчилик билдирган.
Жанубий Кореянинг Yonhap агентлиги ахборотига кўра, Бирлашиш вазирлиги Cheollima Civil Defense ташкилоти ҳақида ҳеч нарса билмайди. Агентликнинг қайд этишича, Чхоллима — «улкан масофаларни жуда тез босиб ўта оладиган афсонавий отдир».
Yonhap’нинг ёзишича, Жанубий Корея разведкасидаги манба видеодаги йигит Ким Хан Соль эканини тасдиқлаган. Буни Associated Press’нинг Жанубий Кореядаги манбалари ҳам тасдиқлаган.
Агентлик ахборотига кўра, овоз таҳлили бўйича мутахассислар видеодаги овозни Ким Хан Соль 2012 йили Финляндия телевидениесига берган интервьюси билан таққослаган ва ҳар икки видеодаги шахс бир киши экани эҳтимоли «жуда юқори»лигини билдирган.
Мавжуд маълумотларга кўра, Ким Хан Соль 21 ёшда. У Ким Чон Намнинг иккинчи турмушидан бўлиб, ота-онаси ва синглиси билан бирга Макаода яшаб келган. Хабарларга кўра, у Босния ва Францияда таълим олган. 2012 йили Финляндия телевидениесига берган интервьюсида ҳар йили қариндошларини кўргани КХДРга боришини маълум қилган эди.
КХДР етакчиси Ким Чен Иннинг акаси Ким Чон Нам 13 февраль куни Куала-Лумпур аэропортида уюштирилган суиқасддан сўнг вафот этди. Тергов маълумотларига кўра, икки аёл — Вьетнам ва Индонезия фуқаролари Ким Чон Намнинг юзига заҳарловчи модда суртилган мато ташлаган. Гумонланувчиларнинг ҳар иккиси ҳибсда сақланмоқда.
Малайзия ҳукумати қотиллик Шимолий Корея раҳбарияти томонидан уюштирилган, деб гумон қилмоқда (бу ҳақда Малайзия бош вазири очиқчасига баёнот берди). Ўз навбатида, КХДР томони Ким Чон Нам юрак хуружидан вафот этганини билдириб, Малайзия олиб бораётган терговга ишонмаслигини маълум қилди.
Шундан сўнг Малайзия Шимолий Кореяга нисбатан визасиз тартибни бекор қилди ва ушбу мамлакат элчисини ўз ҳудудидан чиқариб юборди. Бунга жавобан КХДР Малайзия элчисини персона нон грата деб эълон қилди.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)