Ироқ ИШИДнинг қўшни мамлакатлардаги марраларига «иккиланмасдан» зарба бериш ниятида

Ироқ қуролли кучлари ИШИД террорчилик ташкилотининг қўшни давлатлардаги марралари жойлашган ҳудудларга иккиланмасдан зарба беради. Бу ҳақда Ироқ қуролли кучларининг бош қўмондони, бош вазир Ҳайдар ал-Ободий баёнот берди, деб ёзади «ТАСС».

«Мен қўшни мамлакатлардаги террорчилар жойлашган ҳудудларга зарба беришга ҳеч қачон иккиланмайман, биз улар билан курашни давом эттирамиз», — деди ал-Ободий. Айни вақтда, расмий Бағдод чегарадош давлатлар суверенитетини ҳурмат қилишини ҳам маълум қилди.

Февраль ойининг охирида Ироқ қуролли кучлари Суриянинг Ироқ билан чегарадош ҳудудидаги Албу-Камал минтақасига жойлашиб олган террорчиларга ҳаво зарбаларини берган эди. Рейд икки мамлакат разведкасининг ҳамкорлиги доирасида ўтказилгани хабар берилган эди.

Ироқ ҳукуматининг маълумотларига кўра, йўқ қилинган гуруҳлар Бағдодда амалга оширилган ва ўнлаб тинч аҳоли вакилларининг умрига зомин бўлган терактларга алоқадор бўлган.

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.

«Дарё»нинг Telegram’даги расмий канали — @toshqindaryo’га аъзо бўлинг!