Ўзбекистон Президенти Шавкат Мирзиёев ва Туркманистон президенти Гурбангули Бердимуҳамедов 6 март куни Ашхободда бўлиб ўтган музокаралар якуни бўйича икки мамлакат ўртасида Стратегик шерикчилик тўғрисидаги шартномани имзолади. Бу ҳақда «Газета.uz» хабар бермоқда.
Шунингдек, президентлар гувоҳлигида 2018—2020 йилларга мўлжалланган Иқтисодий ҳамкорлик тўғрисидаги шартнома, Темирйўл транспорти соҳасидаги ҳамкорликни ривожлантириш тўғрисидаги меморандум, Маданий-гуманитар соҳада 2017—2019 йилларга мўлжалланган ҳукуматлараро ҳамкорлик дастури ва Ташқи ишлар вазирликлари ўртасида 2017—2018 йилларга мўлжалланган ҳамкорлик дастури имзоланди.
Туркманистон Темирйўл транспорти вазирлиги, Қишлоқ ва сув хўжалиги вазирлиги ҳамда «Туркманхимия» давлат концерни Ўзбекистон корхона ва ташкилотлари билан битимлар имзолади.
Давлат раҳбарларининг «юзма-юз» форматдаги музокаралари вақтида савдо-иқтисодий соҳалардаги муносабатларни ривожлантириш масалалари, маданий-гуманитар алоқаларнинг муҳимлиги ҳақида фикр алмашилган. Энергетика ва транспорт соҳалари ҳамкорликнинг стратегик йўналишлари сифатида эътироф этилган.
Экологик соҳадаги икки томонлама ва халқаро форматдаги муносабатларни фаоллаштириш масалаларига алоҳида аҳамият қаратилди. Сайёҳлик, гуманитар, илмий ва спорт соҳаларидаги ҳамкорлик масалалари муҳокама қилинди.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)