АҚШ президенти Дональд Трамп мамлакатнинг аввалги раҳбари Барак Обамани унинг Нью-Йоркдаги телефонини ноқонуний равишда эшитиб турганликда айблади. 4 март куни Трамп кетма-кет твитлар ёзиб, Обамани «янги Уотергейтни уюштирганликда» айблади (Meduza’нинг ёзишича, бунда гап АҚШ президенти Ричард Никсоннинг истеъфоси билан якунига етган ноқонуний эшитиш билан боғлиқ можаро ҳақида бормоқда).
«Даҳшат! Ғалабам арафасида Обама Трамп минорасига менга қарши ‘қўнғиз’лар ўрнатганини ҳозиргина билдим. Ҳеч нарса топилмаган. Бу маккартизм!», — деб ёзди Трамп твитларининг бирида.
«Муқаддас сайловлар жараёнида менинг телефонларимни эшитиб туришга қарор қилган бўлса, президент Обама қанчалик пасткашлик қилибди-я! Бу Никсон/Уотергейт. Ёмон (ёки касал) одам!», — деб ёзди Трамп бошқа бир твитида.
The New York Times’нинг қайд этишича, Дональд Трамп унинг телефонлари ҳақиқатан ҳам эшитилгани юзасидан ҳеч қандай далил-исбот тақдим этмаган. Президентнинг ходимлари ҳам унинг айбловлари нимага асосланганини тушунтириб бера олмаган.
CNN аввалги президент маъмуриятидаги юқори мартабали мулозимга асосланиб, Трампнинг телефонлари эшитиб борилмагани ҳақида хабар бермоқда. «Бундай бўлмаган. Бу нотўғри. Ёлғон», — деди CNN манбаси.
The New York Times’нинг тахминича, Обамага қарши қаратилган айбловлар Трамп атрофидаги одамларнинг Россия билан алоқалари тўғрисидаги мақолаларга жавоб бўлиши мумкин. Телефонлар эшитилгани ҳақидаги твитлар билан бир қаторда Трамп Россия элчиси Сергей Кисляк Обама президент бўлган вақтда Оқ уйга 22 марта келгани ҳақида ҳам ёзган.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)