Малайзия расмийлари 6 мартдан бошлаб Шимолий Корея фуқаролари учун мамлакатга визасиз кириш тартибини бекор қилади. Бу ҳақда мамлакат бош вазирининг ўринбосари Аҳмад Зоҳид Ҳомидий маълум қилди, дея хабар беради «ТАСС».
«Келгуси душанбадан бошлаб Малайзияга киришда КХДР фуқаролари учун виза мажбурий ҳисобланади. Бу чоралар миллий хавфсизлик, шунингдек, Шимолий Корея фуқаролари иштирокидаги яқиндаги воқеалар билан боғлиқ», — дея таъкидлади бош вазир ўринбосари.
Ҳозирда КХДР фуқаролари Малайзияда 30 кун мобайнида визасиз туриши мумкин.
Эслатиб ўтамиз, Малайзия Интерполга КХДР етакчиси Ким Чен Иннинг акаси Ким Чон Намнинг ўлдирилишида гумон қилинаётган Шимолий Кореянинг 4 нафар фуқаросини қидирувга бериш ҳақида талабнома йўллади.
Шунингдек, полиция Куала-Лумпур аэропортида Ким Чон Нам ўлими куни бўлган КХДРнинг Малайзиядаги элчихонаси иккинчи котиби ва Air Koryo авиакомпанияси ходимини сўроқ қилиш учун рухсат сўраб, КХДРнинг Малайзиядаги элчихонасига мурожаат қилди.
Изоҳ (0)