Швейцарияда 20 йилдан буён яшаётган инглиз Жон Грин Альп тоғи ҳавоси билан тўлдирилган уч литрли бутилкани 247 доллардан сотади. Тадбиркор Альп тoғларининг баланд нуқталаридан тоғ ҳавосини тўплаб, дунёнинг ифлосланган шаҳарларига етказиб беришни режалаштирмоқда. Бу ҳақда Mirror нашрига таяниб, «Газета.ru» хабар берди.
Гриннинг сўзларига кўра, у ҳавони жуда машҳур тоғнинг ёнида жойлашган булоқ яқинидаги «махфий» жойда тўплайди. Ҳаво тўпланган жойни фақатгина харидор била олиши мумкин. Ҳаво тўлдирилган идишга ҳаво тўпланган жойнинг GPS манзили ва ҳақиқийлик сертификати қўшиб берилади.
«Агар сен ифлосланган шаҳарда яшасанг, дизель тутунларидан нафас олсанг, биз ҳозиргина 3000 метр баландликдаги тоғ ҳавосининг янги захираларини тўпладик ва уни сенга жўнатишга тайёрмиз», — дейди Грин ўз сайтига жойлаган промовидеода.
Швейцария тоғ ҳавосини турли ҳажмдаги идишларда сотиб олиш мумкин: уч литр 247 доллар, бир литр 167 доллар, ярим литр 96 доллар.
Шунингдек, лойиҳа муаллифи даромаднинг 25 фоизини Африканинг World Vision Clean жамғармасига ажратишга ваъда бермоқда.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)