Сирдарё вилоятининг Боёвут туманида Олий Мажлис Сенати аъзолари ва Қонунчилик палатаси депутатлари 10 кун давомида 422 та хонадонда бўлиб, аҳоли турмуш тарзи, яшаш шароити билан танишди. Бу ҳақда «Халқ сўзи» хабар бермоқда.
Мулоқотлар давомида аниқланган 235 та масаланинг 33 таси жойида ҳал этилди, 201 таси юзасидан тегишли идора ҳамда ташкилотларга тавсиялар берилди. Ижро ҳокимияти, прокуратура, ички ишлар ва бошқа ҳуқуқни муҳофаза қилувчи органлар, турли соҳа ва объектлар фаолияти ўрганилиб, уларнинг самарадорлиги таҳлил қилинди. Очиқ мулоқот тарзида ташкил этилган халқ депутатлари Боёвут тумани Кенгашининг сессиясида ушбу ўрганиш натижалари танқидий руҳда атрофлича кўриб чиқилди.
Тумандаги 47 та фуқаролар йиғини фаолияти, уларнинг ҳуқуқ ҳамда ваколатларини тўлиқ ва самарали амалга ошириш ҳамда моддий-техника аҳволи юзасидан олиб борилган ўрганишлар айрим фуқароларнинг ўзини ўзи бошқариш органлари жойлашган бинолар талаб даражасида эмаслигини кўрсатди.
Шунингдек, аҳолига тиббий хизмат кўрсатиш, таълим муассасалари ҳамда касб-ҳунар коллежларида аниқланган камчиликлар депутатлар эътиборига ҳавола этилди. Тиббиёт масканлари, хусусан, қишлоқ врачлик пунктлари дори воситалари, тиббиёт асбоб-ускуналари билан етарлича таъминланмагани, шифокорлар етишмаслиги билан боғлиқ қатор масалалар ўз ечимини кутаётганлиги айтиб ўтилди.
Аҳоли ва юридик шахсларнинг кўпроқ эътирозига сабаб бўлаётган ичимлик суви, электр энергияси, газ таъминотидаги узилишлар ҳамда ободонлаштириш, санитария-гигиена, уй-жой, коммунал хизмати кўрсатиш соҳасидаги камчиликларни бартараф этиш бўйича ҳам аниқ таклиф ва тавсиялар ишлаб чиқиш лозимлигига урғу берилди.
Халқ депутатлари Қуйи Чирчиқ тумани Кенгаши сессиясида Тошкент вилоятидан сайланган Олий Мажлис Қонунчилик палатаси депутатлари, Сенат аъзолари, хўжалик юритувчи субъектлар, нодавлат ташкилотлар вакиллари ва тадбиркорлар қатнашди.
Туманда парламент вакилларидан иборат ишчи гуруҳи хонадонларда бўлиб, аҳоли билан бевосита учрашувлар ўтказди ва тегишли соҳалардаги аҳволни ўрганди. Чунончи, 193 та хонадонга ташриф буюриб, аҳолининг 141 муаммоси аниқланди. Аҳоли томонидан кўтарилган муаммолар чуқур таҳлил қилиниб, уларнинг 9 таси жойида ҳал этилди, 125 та масала бўйича тегишли идораларга тавсиялар берилди, 7 та масала республика даражасида ҳал этилиши лозимлиги сабабли тегишли таклифлар ишлаб чиқилди.
Сессияда тумандаги савдо дўконлари, маиший хизмат кўрсатиш ва умумий овқатланиш корхоналари, дорихоналар фаолиятидаги камчиликлар ҳақида сўз борди. Ўрганилган касб-ҳунар коллежларининг деярли барчасида замонавий ахборот-коммуникация технологиялари, ўқув материаллари, компьютерлар, айрим дарслик ва адабиётлар етишмайди. Транспорт хизматининг лозим даражада йўлга қўйилмаганлиги коллеж ва мактаб ўқувчилари учун қийинчиликлар туғдирмоқда. Тумандаги 13 та мактаб таъмирталаб аҳволда.
Сессияда аҳолига кўрсатилаётган бирламчи тиббий ёрдам даражаси ва сифатини ошириш, тиббиёт муассасаларини дори воситалари билан таъминлашда камчиликлар борлиги қайд этилди. Жумладан, тез тиббий ёрдам бригадалари алоқа воситалари билан таъминланмаган. Қишлоқ врачлик пунктлари жиҳозлари эскирган. Тумандаги йўл инфратузилмасининг аҳволи, шунингдек, аҳолининг маданий ҳордиқ чиқариши учун етарли шароит яратилмагани танқид қилинди.
Бўлиб ўтган сессияларда тегишли идоралар ҳамда ташкилотлар раҳбарлари ҳисоботлари эшитилди. Муҳокама этилган масалалар бўйича тегишли қарорлар қабул қилинди. Уларда Олий Мажлис Сенати Раиси Ниғматилла Йўлдошев иштирок этди ва сўзга чиқди.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)