Тошкентдаги Халқаро бизнес марказида Ўзбекистон ва Россия ўртасидаги иқтисодий ҳамкорлик бўйича ҳукуматлараро комиссиянинг 18-йиғилиши бўлиб ўтди. Йиғилишда икки мамлакат ўртасида таълим соҳасидаги ҳамкорликни янада кенгайтириш борасида Ўзбекистон томонидан бир қатор таклифлар билдирилди. Ўзбекистон Республикаси Бош вазирининг ўринбосари Рустам Азимов йиғилишнинг кириш қисмидаги нутқида бу масалага тўхталиб ўтди.
Бош вазир ўринбосари Ломоносов номидаги Москва давлат университети, Губкин номидаги давлат нефть-газ университети, Плеханов номидаги иқтисодиёт университетининг филиаллари муваффақиятли фаолият олиб бораётганини таъкидлаб ўтди. Ломоносов номидаги Москва давлат университетининг Тошкентдаги филиалида амалий математика ва информатика мутахассислиги бўйича магистратура босқичини очиш, кейинчалик табиий фанлар бўйича янги факультетни очиш масаласи таклиф қилинди.
Шунингдек, Ўзбекистонда Технологик илмий-тадқиқот университетининг қора ва рангли металлар, тоғ иши ва геологик тадқиқот йўналишлари бўйича филиалини очиш масаласи ҳам таклиф қилинди. Бу масалада Губкин номидаги давлат нефть-газ университети ва Қарши муҳандислик иқтисодиёт институти ўртасида ҳамкорликда ўқув дастурини амалга ошириш юзасидан келишув имзоланади.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)