Депутатлар ва сенаторлардан иборат ишчи гуруҳ Самарқанд вилоятининг Иштихон тумани аҳолиси билан юзма-юз мулоқот олиб бориб, ижтимоий-иқтисодий ҳаётдаги ютуқ ҳамда муаммолар билан яқиндан танишди, ижро ҳокимияти, ҳуқуқни муҳофаза қилиш органлари фаолиятини ўрганди. Халқ депутатлари Иштихон тумани Кенгаши сессиясида ана шу ўрганиш натижалари қизғин муҳокама қилинди, дея хабар беради «Халқ сўзи».
Сессияда туман аҳолисига ичимлик сувини етказиб бериш ишлари талаб даражасида эмаслиги танқид остига олинди. Бугунги кунда аҳолининг 29 фоизи марказлашган ичимлик суви билан таъминланган. Мактабгача таълим муассасалари, мактаблар, қишлоқ врачлик пунктларида ҳам ичимлик суви таъминоти яхши эмас. Худди шундай ҳолат электр энергияси таъминотида ҳам кузатилади.
Туманда аҳолини, айниқса, касб-ҳунар коллежлари битирувчиларини ишга жойлаштириш чора-тадбирлари тизимли олиб борилмаяпти. Хусусан, 2016- йилда ҳудуддаги 11 касб-ҳунар коллежининг жами 4 минг 416 нафар битирувчисидан 4 минг 98 нафари бандлиги таъминлангани ҳисоботда кўрсатилган бўлиб, амалда уларнинг ҳаммаси ҳам бугунги кунда ўз иш жойига эга эмаслиги танқид қилинди.
Очиқ мулоқотлар асносида фуқаролар йиғинлари раислари аҳоли кенг қатлами билан мунтазам учрашмаслиги, уларнинг муаммолари билан қизиқмаслиги, мурожаатларини эътиборсиз қолдириши, бериладиган турли маълумотномаларни олишда бюрократик ҳолатларга йўл қўйилиши фуқароларнинг ҳақли эътирозига сабаб бўлаётгани баён қилинди.
Шунингдек, уй-жой-коммунал хизмати кўрсатиш, ёшга доир, ногиронлик ва вояга етмаганлар учун бериладиган нафақаларни тайинлаш, тиббий хизмат, таълим, савдо ҳамда маиший хизмат кўрсатиш, автомобиль йўлларининг ҳолати, транспорт хизмати соҳаларида кўзбўямачилик ҳолатлари мавжудлиги аён бўлди.
Шу куни халқ депутатлари Ғаллаорол тумани Кенгаши сессияси бўлиб ўтди. Очиқ ҳамда ошкора руҳда ўтган сессияда халқ вакиллари Ғаллаорол тумани маркази ва қишлоқларида жами 600 га яқин хонадонда бўлиб, уларнинг яшаш шароити, эҳтиёжи, талаб ҳамда таклифлари билан яқиндан танишгани, аҳоли томонидан 800 дан зиёд муаммоли масалалар ўртага ташлангани, булар, асосан, уй-жой-коммунал хизмати кўрсатиш, тиббиёт муассасалари фаолияти, таълим, бандлик, тадбиркорлик, экология, ижтимоий инфратузилма билан боғлиқлиги алоҳида таъкидланди.
Тумандаги банк муассасалари туман бўлимларидаги инфокиосклар ишламаслиги, савдо ҳамда маиший хизмат кўрсатиш объектларида, қатор деҳқон бозорларида харидорлар ва сотувчилар учун қулайликлар яратилмагани, дўконларда аҳолига хизмат кўрсатишда нақд пул ҳамда нақдсиз ҳисоб-китобда маҳсулотлар нархида тафовут борлиги айтиб ўтилди.
Депутатлар ва сенаторлардан таркиб топган гуруҳ томонидан тумандаги 30 га яқин умумтаълим мактабларининг аксариятида ўқитувчи ҳамда ўқувчилар овқатланиши учун зарур шароит йўқлиги, борлари эса санитария-эпидемиологик талабларга жавоб бермаслиги, мактабгача таълим муассасаларига етказиб берилаётган картошка, макарон, гуруч, мош, сариёғ ва гўштнинг сифати талаб даражасида эмаслиги аниқланди.
Сессияда аҳоли бандлигини таъминлаш дастури ижросидаги эътиборсизлик, масъулиятсизлик ҳолатлари қаттиқ танқид қилинди. Аҳолига тиббий хизмат кўрсатиш соҳасида олий тоифали врачлар етишмаслиги, туман аҳолиси учун жуда зарур бўлган травматология, неврология, эндокринология бўлимларининг йўқлиги, тез тиббий ёрдам хизмати ҳам қониқарли аҳволда эмаслиги таъкидланди.
Сессияларда кўрилган масалалар юзасидан тегишли қарорлар қабул қилинди. Уларда Ўзбекистон Республикаси Олий Мажлиси Сенати Раиси Ниғматилла Йўлдошев иштирок этди ва сўзга чиқди.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)