Аралаш жанглар санъати (MMA) жангчиси ирландиялик Конор Макгрегор ва америкалик собиқ боксчи Флойд Мейвезер ўзаро жанг борасида келишиб олди. Бу ҳақда The Irish Sun газетасига асосланиб, «Коммерсант.ru» хабар бермоқда.
Бир неча ой давом этган музокаралардан кейин томонлар «жанг ўтказиш бўйича кўп миллионли келишувга эришди». Келишув ҳозирча расман имзоланмади, аммо жанг муддати икки ҳафта ичида маълум қилиниши кутилмоқда.
Мавзуга доир: Конор Макгрегор ва Флойд Мейвезер ўртасидаги жанг суммаси миллиард долларга тенг бўлиши мумкин
Кейинроқ Мутлақ жангчилик чемпионати (UFC) президенти Дана Уайт Мейвезер ва Макгрегор жанги учун ҳар икки спортчига 25 миллион доллардан тўлашга тайёр эканини маълум қилган эди, бироқ ҳар икки спортчи таклифни жиддий қабул қилмади. Шундан сўнг Дана Уайт мазкур беллашув ирландиялик жангчининг UFC билан шартномаси якунига йэтсагина бўлиб ўтишини айтди.
Маълум муддат ўтгач, Мейвезернинг азалий рақибларидан бири — Менни Пакяо ирландиялик билан жанг қилишга тайёр эканини маълум қилганди. Мейвезер – Макгрегор драмасидан чарчаган «МЮ» ҳужумчиси Златан Ибраҳимович эса уларнинг ҳар иккиси билан жанг қилиб, тўғри шифохонага юборишга ваъда берди.
Маълумот учун, 28 ёшли Макгрегор фаолиятини 2008 йилда бошлаган. Шу вақтгача у 23 та жанг ўтказиб, 20 тасида (17 тасида нокаут билан) зафар қучган ва 3 тасида мағлубиятга учраган. Ирландиялик икки (енгил ва ярим енгил) вазн тоифасида UFC чемпиони бўлган биринчи жангчи сифатида тан олинди. Кейинроқ у ярим енгил вазнда чемпионлик камаридан маҳрум этилганди.2015 йили боксчилик фаолиятини тугатган 39 ёшли Флойд Мейвезер профессионал рингда 49 та жанг ўтказиб, барчасида (26 тасида нокаут билан) ғалаба қозонган. У бешта вазн тоифасида жаҳон чемпионлигини қўлга киритган.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)