Ўзбекистонда хориждан келтириладиган дори воситалари, тиббий буюмлар, тиббиёт асбоб-ускуналари ҳамда дори воситаларини ишлаб чиқаришда фойдаланиш учун хом ашёларга нисбатан божхона тўловларидан кенг кўламли имтиёзлар қўлланиб келинмоқда. Шунга қарамай, мазкур қулайликлардан унумли фойдаланиш ўрнига тадбиркорликнинг сохта йўлини афзал билган айрим устомонлар ҳам учраб турибди. Бу ҳақда «Дарё»га «Тошкент-Аэро» ихтисослаштирилган божхона комплекси ахборот хизмати хабар бермоқда.
Тошкентлик Г.Усмонова (барча исм-шарифлар ўзгартирилган) Деҳлидан қайтаётиб, пойтахт аэропортида тегишли ҳужжатлари бўлмаган ва сифати кафолатланмаган 390 дона кўз учун мўлжалланган дори воситаларини яширинча олиб ўтишга уринган пайтда тўхтатиб қолинди.
Истанбулдан қайтган А.Умиров, У.Ҳамидова, Л.Атоев, Х.Ягмуров, Деҳлидан учиб келган А.Турғунов ҳам дори воситаларини яширин равишда божхона чегараларидан олиб ўтишга уринган пайтда фош қилинди. Ушбу қонунубзарлик ҳолатларида улар томонидан жами қиймати 4 миллион сўмдан ортиқ бўлган 405 дона дори воситасининг ноқонуний олиб кирилишига чек қўйилди.
Туркиядаги сафарини якунлаб, мамлакатга келган хорижий фуқаролардан бири В.Содиқ ҳам божхона қоидаларини бузишга уринди. У йўловчи божхона декларациясида ҳам, оғзаки сўровлар пайтида ҳам маълум қилмасдан туриб, 37 дона стоматология пломбасини олиб кирмоқчи бўлди.
Ҳозирда мазкур ҳолатлар юзасидан божхона текширувлари ва суриштирув ҳаракатлари давом эттирилмоқда.
Шунингдек, «Тошкент-Аэро» ихтисослаштирилган божхона комплекси ходимлари томонидан «Москва—Тошкент» рейси бўйича парвозини якунлаган А.Тўхтаевга тегишли юк божхона кўригидан ўтказилганда, ушбу шахс йўловчи божхона декларациясида қайд этилмаган ҳамда божхона ходимининг оғзаки сўрови пайтида маълум қилинмаган 150 дона сунъий эшитиш мосламасини божхона назоратидан яширин равишда олиб киришга ҳаракат қилди.
А.Тўхтаев божхоначиларнинг кўзини шамғалат қилиш мақсадида, ушбу шахс қиймати салкам 153 миллион сўмлик мазкур тиббий буюмларни уларнинг ўрамларисиз олиб киришга ҳаракат қилган. Шу боисдан ҳам дори воситалари ва тиббий техника сифатини назорат қилиш бўйича мутахассислар мазкур сунъий эшитиш мосламаларини Ўзбекистон Республикасида қайд этилган дори воситалари ва тиббий буюмлар давлат реестрига киритилганлиги тўғрисида маълумот бериш ҳамда таҳлил ишлари олиб бориш имкони йўқ, деган тўхтамга келишди. Ушбу ҳолат юзасидан жиноий иш қўзғатилди.
Таъкидлаш жоизки, 2016 йилда «Тошкент-Аэро» ихтисослаштирилган божхона комплекси ходимлари томонидан ҳуқуқни муҳофаза қилувчи бошқа идоралар вакиллари билан ҳамкорликда аниқланган 130 дан ортиқ қонунбузарлик ҳолатларида қиймати 2,4 миллиард сўмдан ортиқ дори воситалари ва тиббий буюмларнинг яширин олиб ўтилишига чек қўйилди.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)