Шавкат Мирзиёев Сурхондарёда Вьетнам технологияси асосида Африка лаққаси етиштирадиган мажмуа лойиҳаси билан танишди

Ўзбекистон Президент Шавкат Мирзиёев Термиз туманида ташкил этиладиган балиқчилик комплекси лойиҳаси билан танишди, дея хабар бермоқда ЎзА.

Бугунги кунда Сурхондарё вилоятида 186 балиқчилик хўжалиги фаолият юритмоқда. Энди уларнинг сафига «Термиз агро фиш экспорт» агрофирмаси ҳам қўшилади.

Бу ерда балиқ етиштириш билан бирга балиқ озуқаларини ишлаб чиқариш, вилоятда етиштириладиган балиқ маҳсулотларини экспортга йўналтириш ишлари ҳам амалга оширилади.

Корхонада Ветнам технологияси асосида Африка лаққаси, карп каби балиқлар етиштирилади. Сувни мунтазам тозалаб беришга асосланган ушбу технология балиқ етиштириш самарадорлигини беш баробарга оширади.

Комлексда 500 тонна балиқни қайта ишлаш, 105 иш ўрни ташкил этиш режалаштирилган.

«Халқимиз балиқни луқмаи ҳалол деб аташида катта ҳикмат бор, деди Президентимиз. Унинг таркибида инсон саломатлиги учун жуда муҳим бўлган элементлар, витаминлар мавжуд», — дейилади ЎзА ахборотида.

Сурхондарё балиқчилик билан шуғулланиш учун зарур табиий иқлим, сув захираларига эга. Бундан унумли фойдаланиш, ушбу тармоқни янада ривожлантириш учун махсус дастур ишлаб чиқиш керак. Балиқчиликни чуқур биладиган мутахассислар тайёрлаш мақсадга мувофиқдир.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.