2017 йил 8 февраль куни селектор тарзида бўлиб ўтган халқ депутатлари Чимбой тумани Кенгаши сессиясида Олий Мажлис Қонунчилик палатаси ва Сенати аъзолари томонидан туманда олиб борилган ишлар якунлари муҳокама қилинди. Бу ҳақда Ўзбекистон Республикаси Олий Мажлиси Қонунчилик палатаси матбуот хизмати маълум қилди.
Йиғилишда туманни ижтимоий-иқтисодий ривожлантириш, аҳоли турмуш фаровонлигини янада яхшилаш, тадбиркорлик субъектлари фаолиятини қўллаб-қувватлаш борасида бир қатор ташкилий ва амалий ишлар олиб борилаётгани таъкидланди.
Туманда тадбиркорлик субъектларининг сони кўпаймоқда. Ўз навбатида уларга ҳудуддаги тижорат банклари томонидан кредит маблағлари ажратилишига ҳам катта эътибор қаратилмоқда.
Шу билан бирга сессияда ҳали ечимини кутаётган муаммолар мавжудлиги таъкидланди. Тумандаги мутасадди идоралар фаолиятида аҳоли бандилиги масаласига юзаки қараш, расмиятчилик каби ҳолатлар учрамоқда. Айниқса, касб-ҳунар коллежлари битирувчиларини иш билан таъминлаш билан боғлиқ вазифалар долзарб бўлиб турибди.
Фуқаролар аҳолига тиббий хизмат кўрсатиш даражаси ва сифати, айниқса, қишлоқ врачлик пунктлари фаолиятини янада яхшилаш, тиббиёт муассасаларини дори воситалари ва дори-дармонлар билан таъминлашни яхшилаш лозимлиги таъкидлади.
Тумандаги аҳолига савдо ва маиший, коммунал хизмат кўрсатиш даражаси ҳам талаб даражасида эмас. Аҳолини электр энергияси ва газ билан таъминлашда муаммолар мавжуд. Бу аҳолининг эътирозларига олиб келмоқда.
Сессияда халқ депутатлари туман Кенгаши фаолиятини такомиллаштириш, депутатларни ўз сайловчилари олдидаги масъуллигини ошириш, партия гуруҳлари, доимий комиссияларнинг ташаббускорлигини ошириш масалаларига ҳам алоҳида эътибор берилди. Хусусан, тумандаги ижтимоий-иқтисодий соҳада ўз ечимини кутаётган масалаларни Кенгаш йиғилишларида тизимли равишда муҳокама қилиб бориш, депутатлик назоратини кучайтириш лозимлиги қайд этилди.
Сессияда муҳокама қилинган масалалар юзасидан тегишли қарор қабул қилинди.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)