Ўзбекистонда 2016 йилда номусга тегиш ва йўлтўсарлик учун судланиш ҳолатлари камайди

Ўзбекистоннинг фуқаролик ишлари бўйича судлари томонидан 2016 йилда 278 мингдан зиёд иш кўриб чиқилди, дея хабар бермоқда «Газета.uz».

Олий суд матбуот котиби Азиз Обидовнинг сўзларига кўра, судлар чиқарган қарорлар миқдори 87,9 фоизни ташкил этди. Чиқарилган қарорлар бўйича 87,8 фоиз талаблар қондирилди.

Жиноят ишлари бўйича судлар томонидан 84 мингдан зиёд кишига нисбатан қўзғатилган қарийб 62 минг жиноий иш кўриб чиқилган.

Азиз Обидовнинг таъкидлашича, 2016 йилда баъзи жиноят турлари бўйича судланганлик ҳолатининг 2015 йилга нисбатан камайиши кузатилган.

Хусусан, гиёҳванд воситалар ва психотроп моддалар ноқонуний савдоси, номусга тегиш, йўлтўсарлик, босқинчилик, ўғирлик, ҳаракат хавфсизлиги ёки транспорт воситаларидан фойдаланиш қоидаларини бузиш ҳамда безорилик бўйича судланганлик кўрсаткичлари камайган.

Шунингдек, жиноий ишлар бўйича судлар томонидан 433 мингдан зиёд шахсга нисбатан қўзғатилган маъмурий иш кўриб чиқилди.

2016 йилда яраштириш институтининг қўлланилиши натижасида 14 мингдан зиёд шахс жиноий жавобгарликдан озод этилди.

350 миллиард сўмдан зиёд етказилган моддий зарарни қоплаган 6 270 кишига нисбатан озодликдан маҳрум қилиш билан боғлиқ бўлмаган жазо тайинланди.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.