Тошкентдаги Инҳа университети ҳудудида «Ахборот-коммуникация технологиялари инновация маркази» эркин иқтисодий зонасини яратиш режалаштирилмоқда, деб ёзади «Газета.uz» норматив-ҳуқуқий ҳужжатлар муҳокамаси порталига муҳокама учун жойланган Президент фармони лойиҳасига таяниб.
Ҳужжатда ЭИЗнинг 2030 йил 1 январигача ишлаши кўзда тутилган, сўнг ҳудуд янада кенгайтирилиши ва муддат узайтирилиши мумкин. АКТга ихтисослашган ЭИЗнинг яратилиши Ўзбекистоннинг иқтисодий соҳаларига АКТни фаоллик билан жорий қилиш учун қулай муҳит яратишга ва уларнинг рақобатбардошлигини оширишга, соҳадаги корхоналарнинг экспортини ривожлантириш учун имкониятларни кенгайтиришга, шунингдек, кадрлар, илмий-ишлаб чиқариш ва инвестиция-молия салоҳиятини бир ерга тўплашга хизмат қилиши кутилмоқда.
ЭИЗ фаолият юритадиган муддат давомида унинг иштирокчиларига нисбатан алоҳида валюта ва солиқ режими амал қилади. ЭИЗ иштирокчиларини, шунингдек, уларнинг ишчиларини солиққа тортишда соддалаштирилган тартибни ўрнатиш кўзда тутилган.
ЭИЗ иштирокчиларига товарлар (ишлар, хизматлар) экспортидан келган тушумлари доирасида ҳисоб-китоб ва тўловларни, шу жумладан, ишчиларга иш ҳақини нақд ёки нақдсиз шаклда тарқатиш ва дивидендлар тўлашни Ўзбекистон ҳудудида хорижий валютада амалга ошириш ҳуқуқини бериш режалаштирилмоқда.
Изоҳ (0)