Исроил парламенти кўпчилик овоз билан иккинчи ва учинчи ўқишда Фаластин араблари ерларида қурилган манзилгоҳларни қонунийлаштирувчи қонун лойиҳасини қабул қилди, деб ёзади «РБК». Қонун ушбу ҳудудларда барпо этилган 4 мингга яқин манзилгоҳга дахлдор.
Қонун лойиҳасини ёқлаб Кнессетнинг 60 депутати овоз берди, 52 нафари қарши чиқди. Қонун ташаббукорларидан бири, «Байт Иегуди» партиясидан Бецалель Смотрич овоз бериш кунини тарихий деб атади.
Ўз навбатида, мухолифат етакчиларидан бири Ицхак Герсог қонунни «де-факто аннексия (босиб олиш)» деб атади.
Қабул қилинган қонун лойиҳасига кўра, давлат Фаластин арабларига тегишли ерларда қурилган яҳудий аҳоли пунктларини бузмайди. Аммо қонун фақат давлат ташаббуси билан барпо этилган қишлоқлар учунгина амал қилади. Кўчманчилар ўз ташаббусига кўра барпо этилган манзилгоҳлар учун қонуннинг таъсири йўқ.
Эслатиб ўтамиз, аввалроқ БМТ Хавфсизлик Кенгаши Исроил оккупация қилинган ҳудудларда манзилгоҳлар барпо этиши қораланган резолюцияни қабул қилган эди.
Изоҳ (0)