«Ғузор-Бухоро-Нукус-Бейнеу» (А-380) автомобиль йўлининг 184-километрида, Аму-Бухоро канали устида янги ва замонавий кўприк бунёд этилмоқда. Бу ҳақда «Ўзавтойўл» компанияси хабар берди.
2016 йилнинг июль ойида ҳудуддаги эски, 1961 йилда қурилган кўприкнинг бир қисми қулаб тушгани ҳақида аввалроқ хабар берилган эди.
Мавзуга доир: Қарши–Бухоро трассасидаги кўприкнинг бир қисми қулади
Умумий узунлиги 72,5 метр бўлган янги кўприк икки томонлама қатнов қисмига эга бўлиб, ҳар бир қисмининг эни 10 метрдан ортиқ бўлади. Бундан ташқари ҳар иккала томонда ҳам эни қарийб 1,5 метрдан иборат 2 та пиёдалар ўтиш йўлаклари қурилмоқда.
Лойиҳачи ва қурувчилар кўприкнинг ҳар томонлама чидамли бўлишига аҳамият берганлари ҳолда, унинг таянч қирғоқларига 72 дона бетон қозиқлар, ўрта таянч қисмларига эса ҳар бирининг узунлиги 14 метрдан иборат 104 дона металл қувурлар ўрнатмоқда.
Қурилаётган кўприкни мавжуд асосий йўлга боғлаш мақсадида Бухоро томонидан 247 метр, Қарши томонидан эса 178 метр узунликдаги янги асфальтбетон йўл ҳам қурилмоқда. Қурилиш ишлари учун 40 га яқин ишчи-хизматчилар, ҳайдовчи ва механизаторлар куну тун меҳнат қилмоқда.Камолиддин Маҳкамов, Қашқадарё кўприк хўжалигини сақлашга ихтисослашган таъмирлаш-фойдаланиш корхонаси раҳбари
Янги кўприкнинг умумий лойиҳавий қиймати 11,8 миллиард сўмдан ортиқ бўлиб, у Наврўз байрами арафасида фойдаланишга топширилиши мўлжалланмоқда.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)