2017 йил 1–февраль кунидан бошлаб «Тошкент—Андижон—Тошкент» йўналишида қатновчи 61/62, 60/59–сонли йўловчи поездлари ҳамда юк поездларининг мунтазам қатнови яна йўлга қўйилди. Бу ҳақда «Ўзбекистон темир йўллари» АЖ матбуот хизмати хабар бермоқда.
«Ўзбекистон темир йўллари» АЖ 23 январь куни техник-профилактик ишлар ўтказилиши сабабли «Тошкент—Андижон—Тошкент» йўналишидаги поездлар қатнови вақтинча тўхтатилганини билдирганди.
Шу кундан эътиборан ижтимоий тармоқларда қор босган тоғли ҳудуддаги ағдарилган юк вагонлари, цистерналарнинг суратлари айланди. Бу суратлар фойдаланувчилар томонидан фаол муҳокама қилинди.
«РИА Новости» 26 январь куни Ўзбекистон Фавқулодда вазиятлар вазирлиги (ФВВ)га асосланиб, Қамчиқ довони ҳудудида юк поезди состави рельсдан чиқиб кетгани ҳақида хабар берди. ФВВнинг исми кўрсатилмаган вакилига асосланган «РИА Новости»нинг маълум қилишича, Фарғона водийсида 23 январь куни юз берган зилзила оқибатида Қамчиқ довони ҳудудида кўчки юз берган ва юк поезди унинг остида қолган, вагонларнинг бир қисми ағдарилиб кетган. Агентлик манбаси «Ўзбекистон темир йўллари» ва ФВВ бригадалари томонидан зарарланган темир йўл бўлаги қайта тикланаётганини айтиб ўтган.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)