Бугун — 1 февраль куни футбол бўйича Ўзбекистон кубоги ва мамлакат Биринчи лигаси ўйинларига қуръа ташлаш маросими бўлиб ўтди. Унда сўзга чиққан ПФЛ бош директори Фарҳод Магомедов қуйи лига клубларини кескин танқид остига олди ва камчиликларни очиб ташлади.
Магомедовнинг қуръа маросимида айтган гаплари «Championat.asia» сайтида ўз ифодасини топди.
Мақсад ҳақида
Биринчи лига жамоалари раҳбарлари, сизларда мақсад нима? Бизни бироз бўлса-да қониқтирадиган ҳолат йўқ. Лигани минтақаларга бўлдик, клубларга бонуслар ҳам бердик. Аммо ўзгариш бўлмади. Бироз қизиқ бўлсин деб сондан сифатга қараб ҳам юрдик ва 18 та жамоа қолдирдик. Бир неча йил давомида бадал пулларини оширмадик. Бироқ буни кўпчилигингиз тушунмадингиз, қадрига етмадингиз.Бу йилдан клуб раҳбарларини тартибга чақиришга уринамиз. Энди Биринчи лига клублари ҳам ҳалол ўйин декларациясини тўлдиради. Ким тўлдирмаса, лигада иштирок этмайди. Орангизда қарздорлар бўлса, афсуски, рўйхатдан ўтказа олмаймиз.
Фарҳод Магомедов, ПФЛ бош директори
Футболни нимада ўйнаш мумкин?
Футболни оёқ билан ўйнашади! Агар бошқа нарса билан шуғулланмоқчи бўлсангиз, КВНга боринг! Футболчилар ҳакамларни сўкади, майдонда кўнгли тусаганини қилади. Бундай давом этиши мумкин эмас!Биринчи лига клубларининг ўзи Олий лигада ўйнаб кетишига ишонадими ёки йўқми, аниқлик киритилмаган. Бош директор, шунингдек, ҳеч қайси клубга ишонч йўқ бўлса, турнирни ташкил қилишдан мақсад нима эканига ҳам ойдинлик киритмаган.Футбол мухлислар учун ўйналади. Майдонда клублар ўзаро орани очиқ қилиши эмас, футбол ўйнаши керак. Тўғриси, ҳозирда Биринчи лиганинг ҳеч бир клуби олий лигада ўйнаб кетишига ишона олмайман.
Фарҳод Магомедов, ПФЛ бош директори
Магомедовнинг айтишига кўра, «Машъал» энг тартибли жамоа бўлди, «Ғиждувон» эса энг қўполи. Лигада ҳамма клуб камида 1 тадан қизил карточка олган.
Оч-наҳор футболчилар ҳақида
Клуб пулларини иқтисод қилиб, футболчиларга ҳатто овқат ҳам бермаяпсизлар! Футболчи бечора майдонга оч қорин билан тушади. Маош тўлашда қийинчилик бўлса, илтимос, ҳеч бўлмаса унга озгина бўлса шароит қилиб беринглар.Фарҳод Магомедов, ПФЛ бош директори
Расмиятчилик ҳақида
Биринчи лига мураббийларида камида Б лицензияси бўлиши шарт! Лицензияси бўлмаса, бош мураббий бўла олмайди. Бундан ташқари, бу йилдан ҳар бир клуб ўз уй ўйинидан кейин учрашув видеоси ёзилган дискни олиб келиши шарт! 18 та ўйин ўтказдингизми, демак 18 та диск бўлиши лозим. Битта ўйин диски келмаса, 2 миллион жарима тўлайсизлар. Ҳар бир раҳбар буни қора харфларда ёзиб қўйсин! XXI асрда диск ёзиш қийин бўлмаса керак.Фарҳод Магомедов, ПФЛ бош директори
Вилоят ҳокимларига
Иккинчи лига борасида. Вилоят ҳокимлари ва вилоят футбол федерациялари вице-президентлари, илтимос, лигани тартибга келтириб олинглар. Баъзида ёши катта футболчилар ўйнагани, ўйинлар бўлиб ўтмагани ҳақида хатлар келиб тушади. Биз бунга аралашмаймиз. Қайтараман, вилоят футбол федерацияси вице-президентлари, иккинчи лигани жой-жойига қўйиб қўйинлар!Фарҳод Магомедов, ПФЛ бош директори
Чумчуқлар ҳақида
Клуб номини ўзгартирсангиз, расмий хат билан, қонунга доир тарзда амалга оширинглар. «Бўрилар», «чумчуқлар»... Клубларнинг бундай номларини қабул қила олмаймиз. Қўмита номни тасдиқлаганидан кейингина биз уни тан оламиз. Бундан ташқари, ҳар йили логотип алмаштирадиган клублар ҳам бор. Илтимос, буни ҳам бас қилинглар.Биринчи лига клублари учун бадал пули 20 миллион сўм бўлиб қолади. Ўтган йил ҳам шундай эди. Бунда ўзгариш бўлмайди.
Фарҳод Магомедов, ПФЛ бош директори
Изоҳ (0)