Bugun — 1-fevral kuni futbol bo‘yicha O‘zbekiston kubogi va mamlakat Birinchi ligasi o‘yinlariga qur’a tashlash marosimi bo‘lib o‘tdi. Unda so‘zga chiqqan PFL bosh direktori Farhod Magomedov quyi liga klublarini keskin tanqid ostiga oldi va kamchiliklarni ochib tashladi.
Magomedovning qur’a marosimida aytgan gaplari “Championat.asia” saytida o‘z ifodasini topdi.
Maqsad haqida
Birinchi liga jamoalari rahbarlari, sizlarda maqsad nima? Bizni biroz bo‘lsa-da qoniqtiradigan holat yo‘q. Ligani mintaqalarga bo‘ldik, klublarga bonuslar ham berdik. Ammo o‘zgarish bo‘lmadi. Biroz qiziq bo‘lsin deb sondan sifatga qarab ham yurdik va 18 ta jamoa qoldirdik. Bir necha yil davomida badal pullarini oshirmadik. Biroq buni ko‘pchiligingiz tushunmadingiz, qadriga yetmadingiz.Bu yildan klub rahbarlarini tartibga chaqirishga urinamiz. Endi Birinchi liga klublari ham halol o‘yin deklaratsiyasini to‘ldiradi. Kim to‘ldirmasa, ligada ishtirok etmaydi. Orangizda qarzdorlar bo‘lsa, afsuski, ro‘yxatdan o‘tkaza olmaymiz.
Farhod Magomedov, PFL bosh direktori
Futbolni nimada o‘ynash mumkin?
Futbolni oyoq bilan o‘ynashadi! Agar boshqa narsa bilan shug‘ullanmoqchi bo‘lsangiz, KVNga boring! Futbolchilar hakamlarni so‘kadi, maydonda ko‘ngli tusaganini qiladi. Bunday davom etishi mumkin emas!Birinchi liga klublarining o‘zi Oliy ligada o‘ynab ketishiga ishonadimi yoki yo‘qmi, aniqlik kiritilmagan. Bosh direktor, shuningdek, hech qaysi klubga ishonch yo‘q bo‘lsa, turnirni tashkil qilishdan maqsad nima ekaniga ham oydinlik kiritmagan.Futbol muxlislar uchun o‘ynaladi. Maydonda klublar o‘zaro orani ochiq qilishi emas, futbol o‘ynashi kerak. To‘g‘risi, hozirda Birinchi liganing hech bir klubi oliy ligada o‘ynab ketishiga ishona olmayman.
Farhod Magomedov, PFL bosh direktori
Magomedovning aytishiga ko‘ra, “Mash’al” eng tartibli jamoa bo‘ldi, “G‘ijduvon” esa eng qo‘poli. Ligada hamma klub kamida 1 tadan qizil kartochka olgan.
Och-nahor futbolchilar haqida
Klub pullarini iqtisod qilib, futbolchilarga hatto ovqat ham bermayapsizlar! Futbolchi bechora maydonga och qorin bilan tushadi. Maosh to‘lashda qiyinchilik bo‘lsa, iltimos, hech bo‘lmasa unga ozgina bo‘lsa sharoit qilib beringlar.Farhod Magomedov, PFL bosh direktori
Rasmiyatchilik haqida
Birinchi liga murabbiylarida kamida B litsenziyasi bo‘lishi shart! Litsenziyasi bo‘lmasa, bosh murabbiy bo‘la olmaydi. Bundan tashqari, bu yildan har bir klub o‘z uy o‘yinidan keyin uchrashuv videosi yozilgan diskni olib kelishi shart! 18 ta o‘yin o‘tkazdingizmi, demak 18 ta disk bo‘lishi lozim. Bitta o‘yin diski kelmasa, 2 million jarima to‘laysizlar. Har bir rahbar buni qora xarflarda yozib qo‘ysin! XXI asrda disk yozish qiyin bo‘lmasa kerak.Farhod Magomedov, PFL bosh direktori
Viloyat hokimlariga
Ikkinchi liga borasida. Viloyat hokimlari va viloyat futbol federatsiyalari vitse-prezidentlari, iltimos, ligani tartibga keltirib olinglar. Ba’zida yoshi katta futbolchilar o‘ynagani, o‘yinlar bo‘lib o‘tmagani haqida xatlar kelib tushadi. Biz bunga aralashmaymiz. Qaytaraman, viloyat futbol federatsiyasi vitse-prezidentlari, ikkinchi ligani joy-joyiga qo‘yib qo‘yinlar!Farhod Magomedov, PFL bosh direktori
Chumchuqlar haqida
Klub nomini o‘zgartirsangiz, rasmiy xat bilan, qonunga doir tarzda amalga oshiringlar. “Bo‘rilar”, “chumchuqlar”... Klublarning bunday nomlarini qabul qila olmaymiz. Qo‘mita nomni tasdiqlaganidan keyingina biz uni tan olamiz. Bundan tashqari, har yili logotip almashtiradigan klublar ham bor. Iltimos, buni ham bas qilinglar.Birinchi liga klublari uchun badal puli 20 million so‘m bo‘lib qoladi. O‘tgan yil ham shunday edi. Bunda o‘zgarish bo‘lmaydi.
Farhod Magomedov, PFL bosh direktori
Izoh (0)