Ўзбекистонда Оролбўйи минтақасини ривожлантириш жамғармаси ташкил этилади

Ўзбекистон Молия вазирлиги ҳузурида Оролбўйи минтақасини ривожлантириш жамғармаси ташкил этилади, деб хабар беради «Газета.uz».

Бу ҳақда Ўзбекистон Республикаси Президентининг 2017 йил, 18 январда имзоланган «2017—2021 йилларда Оролбўйи минтақасини ривожлантириш Давлат дастури тўғрисида»ги қарорида кўрсатиб ўтилган.

Жамғарма Оролбўйи минтақасини ривожлантириш бўйича чора-тадбирларни амалга оширишни молиявий жиҳатдан ишончли ва барқарор таъминлаш мақсадида ташкил этилмоқда.

Қуйидагилар жамғармани шакллантириш манбалари этиб белгиланди: Ўзбекистон Тикланиш ва тараққиёт жамғармасига ўтказилиши лозим бўлган маблағларнинг 10 фоизи; автомобилларга газ тўлдириш компрессор станциялари томонидан сотиладиган табиий газга махсус инвестициявий устама ҳақининг 10 фоизи; давлат бюджетининг мақсадли маблағлари, жумладан, марказлаштирилган инвестициялар; халқаро молия институтлари ва бошқа хорижий донорларнинг имтиёзли кредитлари (қарзлари); жисмоний ва юридик шахсларнинг, хайрия жамғармаларининг грантлари, ихтиёрий бадаллари, хорижий донорларнинг маблағлари; жамғарманинг вақтинча бўш маблағларини жойлаштиришдан тушадиган даромадлар.

Оролбўйи минтақасини ривожлантириш Давлат дастури доирасида умумий қиймати 8,422 триллион сўмлик лойиҳаларни амалга ошириш кўзда тутилган. Дастур янги иш ўринларини яратиш, минтақанинг инвестициявий жозибадорлигини ошириш, сув таъминоти, канализация, санитария тизимлари ва маиший чиқиндиларни бартараф этиш, соғлиқни сақлаш тизими, аҳоли турар жой шароитларини яхшилаш, ҳудудларни ободонлаштириш, болалар ва спорт майдончаларини ташкил этиш, транспорт, муҳандислик ва коммуникация инфратузилмаларини ривожлантириш, суғориш ва ташқи ёритиш тармоқларини такомиллаштириш, замонавий энергия тежайдиган технологияларини жорий этган ҳолда Нукус ва Урганч шаҳарларининг иссиқлик таъминоти тизимларини яхшилашни ўз ичига олади.

Давлат раҳбари қарори билан Қорақалпоғистоннинг Мўйноқ, Шуманай, Қонликўл, Тахтакўпир, Хоразм вилоятининг Янгиариқ ва Қўшкўпир туманларида 2027 йил 1 январига қадар (Қорақалпоғистон республикаси ва Хоразм вилоятининг бошқа туманларида — 2022 йилгача) саноат соҳасида (автомобилларга газ тўлдириш компрессор станцияларидан ташқари) янги ташкил этилаётган микрофирмалар ва кичик корхоналар ягона солиқ тўловини тўлашдан озод қилинди.

Бундан ташқари, 1 февралдан Қорақалпоғистон республикаси ва Хоразм вилоятидаги болаларнинг мактабгача таълим муассасалари, айрим фанлар чуқур ўргатиладиган ихтисослаштирилган мактаб-интернатлар, «Баркамол авлод» марказлари, мусиқа ва санъат мактабларидаги машғулотлар учун ота-оналарнинг ҳар ойлик тўлови миқдорлари, шунингдек аҳолининг маданият ва дам олиш марказларидаги тўлов миқдорлари республика бўйича белгиланганидан 2 баравар кам даражада ўрнатилди.

Минтақадаги муҳтож оилаларгаа, биринчи навбатда, ёлғиз фуқаролар, пенсионерлар, боқувчиси ногирон оилалар ҳамда бошқа кам таъминланган тоифадаги аҳоли ва оилаларга қишлоқ (маҳалла) фуқаролар йиғинларининг комиссиялари қарорига биноан тайинланадиган энг кам ойлик иш ҳақининг 2—5 баравари миқдорида бир марта бериладиган моддий ёрдам шаклидаги ижтимоий нафақанинг янги тури жорий этилади.