2016 йилнинг июлида McKinsey Global Institute компанияси ўтказган тадқиқотларга кўра, ўн йил ичида дунёнинг 25 та ривожланган мамлакати аҳолисининг учдан икки қисмининг даромадлари ўзгармаган ва ҳатто камаймаган. Бундай вазият Иккинчи жаҳон урушидан буён биринчи марта кузатилмоқда.
Шунингдек, 2015 йил маълумотларига кўра, Иқтисодий ҳамкорлик ва тараққиёт ташкилоти мамлакатларида меҳнатга лаёқатли ёшдаги аҳолининг 60,2 фоизи меҳнат билан банд бўлган, бу 2007 йилдаги кўрсаткичдан 0,6 фоизга кам демакдир.
Бундан ташқари, Халқаро меҳнат ташкилоти маълум қилишича, 2004 йилдан 2011 йилгача Европадаги ўрта синф вакилларининг умумий сони 2,3 фоизга камайган ва ушбу тенденция барқарор бўлиб қолмоқда.
Credit Suisse ташкилоти ўтган йилнинг ноябрида тақдим этган анъанавий маърузасида бир йил ичида глобал бойлик 1,4 фоизга ўсиб, 255,7 триллион долларга етганини маълум қилди.
Аммо жаҳон мулки ўта нотекис тақсимланмоқда. Вояга етган аҳолининг ярми дунё бойлигининг атиги 1 фоизига эгалик қилади. Шу билан бирга, жаҳон бойлигининг ярмидан кўпроғи (50,8%) 1 фоиз ўта бадавлатлар ҳиссасига, тўртдан уч қисми (77,7%) — 5 фоиз энг бойлар ҳиссасига тўғри келади, 10 фоиз энг таъминланганлар эса дунё бойлигининг 89,1 фоизига эгалик қилади.
Кўплаб экспертлар фикрича, дунё аҳолиси бойлигининг бундай нотекис тақсимланишига асосан, жаҳон иқтисодий инқирози оқибатлари, шунингдек, етарлича фаол ўсмаётган тикланиш сабаб бўлмоқда. Бу сабабларни инвестицияларнинг паст даражаси, меҳнат ресурслари ўсишининг секинлашуви, меҳнат самарадорлиги ўсиш суръатининг пасайиши каби бир қатор узоқ муддатли салбий иқтисодий ва демографик трендлар чуқурлаштирмоқда.
Технологик инқилоб, иш ўринларининг ривожланаётган мамлакатларга кўчиши, нотўлиқ ва вақтинчалик бандликнинг ўсиши таъсири остида меҳнат бозорларида сезиларли ўзгаришлар юз бермоқда. Бундай ўзгаришлар маошларнинг миллий даромаддаги ҳиссаси камайиб, ушбу даромад тобора нотекис тақсимланишига олиб келмоқда. Бу тенденциялар шунчаки барқарор бўлиб қолмай, улар кучайиб бораверади.
Виктор Абатуров
Изоҳ (0)