Шотландиялик аёл саратон беморларига ёрдам бериш учун 1994 йилдан бери биринчи марта сочини олдирди. Унинг сочи 140 сантиметр эди

Шотландиянинг Абердин шаҳрида яшовчи Элейн Мейс исмли аёл узунлиги 140 сантиметр бўлган сочларини олдириб ташади. Бу ҳақда BBC News хабар бермоқда.

Аёл саратонни ўрганиш ва унинг олдини олиш бўйича тадқиқотларни молиялаштирувчи ташкилот учун пул йиғиш мақсадида сочларидан воз кечган. Хабар беришларича, 56 ёшли Мейснинг бир неча қариндоши ва дўстлари саратондан вафот этган.

У 1994 йилдан бошлаб сочини олдирмай қўйган, айни вақтда, агар кимда-ким саратонга қарши кураш учун 1 фунт-стерлинг хайрия қиладиган бўлса, 1 миллиметрдан сочини калталатишни ваъда қилган. Натижада Мейс сочларини бутунлай кал қилиб олдириб ташлаб, 2,4 минг фунт тўплашга муваффақ бўлди.

Элейн Мейс ўзининг янги соч турмагидан жуда ҳам мамнун. У хайрия акциясидан тушган пулни Cancer Research UK ташкилотига ўтказиб берган. Унинг кесилган сочларидан саратон билан хасталанган болалалар учун ясама соч тайёрланади.

Аввалроқ хитойлик бир аёл Гиннеснинг рекордлари китобига кириш учун сочини 35 йил давомида 2,52 метргача ўстиргани ҳақида хабар берилган эди.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.