Бугун — 26 январь куни тонгда Ўзбекистон миллий терма жамоасининг собиқ бош мураббийи Вадим Абрамов «Бухоро» клубини қабул қилиб олгани ҳақида хабар чиққанди. Кейинроқ ЎФФ ва ПФЛ бу хабар ҳақиқатдан узоқ экани ҳақида маълум қилди.
Орадан кўп ўтмай «Бухоро» футбол клубининг расмий сайти Вадим Абрамов жамоада иш бошлаганини расман эълон қилди.
Бунда собиқ бош мураббий Жамшид Саидов ҳамда маслаҳатчи мураббий Тачмурод Агамуродов истеъфога чиқарилгани айтилган бўлиб, уларнинг ўрнини Улуғбек Бақоев ҳамда Вадим Абрамов эгаллагани борасида маълумот берилган.
Эндиликда «Бухоро» клубини расман Улуғбек Бақоев бош мураббий сифатида бошқаради. Вадим Абрамов эса унга маслаҳатчи сифатида ёрдам беради. Мураббийлар штабида Шуҳрат Файзиев ва Нурилло Ҳабибов номлари ҳам бор.
Штаб селекция ишларини бошлаб юборган. Яқин кунларда «Бухоро» мазкур мураббийлар қўли остида машғулот бошлайди.
Маълумот учун, «Бухоро»нинг эндиликдаги собиқ мураббийлари вилоят ҳокимиятида бўлиб ўтган йиғилишдан сўнг ишдан бўшатилган.
Бунга қадар Тошкентнинг «Обод» клуби Ўзбекистон миллий терма жамоасининг бошқа бир собиқ мураббийи Рауф Инилеев билан шартнома имзолаган бўлса, «Олмалиқ» бош мураббий сифатида Виктор Кумиковни таништирганди.
Изоҳ (0)