Bugun — 26-yanvar kuni tongda O‘zbekiston milliy terma jamoasining sobiq bosh murabbiyi Vadim Abramov “Buxoro” klubini qabul qilib olgani haqida xabar chiqqandi. Keyinroq O‘FF va PFL bu xabar haqiqatdan uzoq ekani haqida ma’lum qildi.
Oradan ko‘p o‘tmay “Buxoro” futbol klubining rasmiy sayti Vadim Abramov jamoada ish boshlaganini rasman e’lon qildi.
Bunda sobiq bosh murabbiy Jamshid Saidov hamda maslahatchi murabbiy Tachmurod Agamurodov iste’foga chiqarilgani aytilgan bo‘lib, ularning o‘rnini Ulug‘bek Baqoyev hamda Vadim Abramov egallagani borasida ma’lumot berilgan.
Endilikda “Buxoro” klubini rasman Ulug‘bek Baqoyev bosh murabbiy sifatida boshqaradi. Vadim Abramov esa unga maslahatchi sifatida yordam beradi. Murabbiylar shtabida Shuhrat Fayziyev va Nurillo Habibov nomlari ham bor.
Shtab seleksiya ishlarini boshlab yuborgan. Yaqin kunlarda “Buxoro” mazkur murabbiylar qo‘li ostida mashg‘ulot boshlaydi.
Ma’lumot uchun, “Buxoro”ning endilikdagi sobiq murabbiylari viloyat hokimiyatida bo‘lib o‘tgan yig‘ilishdan so‘ng ishdan bo‘shatilgan.
Bunga qadar Toshkentning “Obod” klubi O‘zbekiston milliy terma jamoasining boshqa bir sobiq murabbiyi Rauf Inileyev bilan shartnoma imzolagan bo‘lsa, “Olmaliq” bosh murabbiy sifatida Viktor Kumikovni tanishtirgandi.
Izoh (0)