@ToshqinDaryo’да хато овозли хабар чиқди. Узр сўраймиз!

«Дарё» интернет-нашри кеча хатога йўл қўйди: Telegram’даги расмий каналимиз — @ToshqinDaryo’га ҳали эълон қилишга тайёр бўлмаган овозли хабар чиқиб кетди. Сийқаси чиққан ўша гапда айтилганидек — иш бор жойда хато бор, лекин биз бу билан ўзимизни оқламоқчи эмасмиз. Бу хато бизни янада эътиборлироқ ва пухта бўлишга, сайтда берилаётган, ижтимоий тармоқлардаги каналларимизга чиқарилаётган ахборотни қайта-қайта текширишга, энг асосийси — хато қилмасликка ундайди.

@ToshqinDaryo’да хато овозли хабар пайдо бўлиши билан, биз «Дарё»нинг кўплаб муштарийларидан ўнлаб хабарлар олдик. Синчков ўқувчиларимиз хатога йўл қўйганимиз ҳақида бизни хабардор қилди, «Дарё»нинг обрўси учун қайғурди, ортиқ хато қилмасликни тилади. Ўша лаҳзаларда бежизга ишламаётганимиз, сайтимиз, тармоқлардаги каналларимиз, бу каналлар доирасида қилаётган лойиҳа(ча)ларимиз аҳамиятга эга экани ва кўлами катталигини яна бир бор ҳис қилдик.

Telegram’даги расмий каналимиз — @ToshqinDaryo’даги кечаги хатолик учун барча муштарийларимиздан узр сўраймиз ва биз учун кўзгу бўлиб, қимматли вақтини аямай, баъзи хато ва камчиликларимиздан бизни бохабар қилиб турган барча ўқувчиларимизга миннатдорчилик билдирамиз!

Telegram’даги @ToshqinDaryo каналида татбиқ этган лойиҳаларимиздан бири — овозли хабарлардир. Унда «Дарё» интернет-нашрида эълон қилинган янгиликлар овозли тарзда бериб борилади. Матнлар қайта-қайта текширилгани ва фильмлардаги саҳна кўринишлари бир неча дублда суратга олингани каби, овозли хабарлар ҳам кўпинча бир неча «дубл»дан сўнг тайёр бўлади (кечаги хатолик ҳам айнан «хато биринчи дубл» эди).

Хато овозли хабар учун бизни танқид қилганлар ҳам бўлди — биз бу хатолик учун яна бир бор барча муштарийларимиздан узр сўраймиз. Айни вақтда, уни эшитиб кайфияти кўтарилганлар ҳам кам эмаслигини билдик. Таҳририятда ҳам овозли хабарларнинг «ўхшамаган дубллари»ни қайта тинглаб, кайфиятни кўтариш одатимиз йўқ эмас. Жеки Чан фильмлари охирида титрлар билан ёнма-ён кўрсатиладиган ўхшамаган дубллар намойиши услубидаги @ToshqinDaryo’нинг «ўхшамаган овозли хабарлари жамланмаси» сизга ҳам хуш кайфият улашишига умид қиламиз.

«Дарё»ни ўқинг, @ToshqinDaryo’да овозли хабарларни тингланг! Янгиликлар дарёсидан узоқлашманг!