“Daryo” internet-nashri kecha xatoga yo‘l qo‘ydi: Telegram’dagi rasmiy kanalimiz — @ToshqinDaryo’ga hali e’lon qilishga tayyor bo‘lmagan ovozli xabar chiqib ketdi. Siyqasi chiqqan o‘sha gapda aytilganidek — ish bor joyda xato bor, lekin biz bu bilan o‘zimizni oqlamoqchi emasmiz. Bu xato bizni yanada e’tiborliroq va puxta bo‘lishga, saytda berilayotgan, ijtimoiy tarmoqlardagi kanallarimizga chiqarilayotgan axborotni qayta-qayta tekshirishga, eng asosiysi — xato qilmaslikka undaydi.
@ToshqinDaryo’da xato ovozli xabar paydo bo‘lishi bilan, biz “Daryo”ning ko‘plab mushtariylaridan o‘nlab xabarlar oldik. Sinchkov o‘quvchilarimiz xatoga yo‘l qo‘yganimiz haqida bizni xabardor qildi, “Daryo”ning obro‘si uchun qayg‘urdi, ortiq xato qilmaslikni tiladi. O‘sha lahzalarda bejizga ishlamayotganimiz, saytimiz, tarmoqlardagi kanallarimiz, bu kanallar doirasida qilayotgan loyiha(cha)larimiz ahamiyatga ega ekani va ko‘lami kattaligini yana bir bor his qildik.
Telegram’dagi rasmiy kanalimiz — @ToshqinDaryo’dagi kechagi xatolik uchun barcha mushtariylarimizdan uzr so‘raymiz va biz uchun ko‘zgu bo‘lib, qimmatli vaqtini ayamay, ba’zi xato va kamchiliklarimizdan bizni boxabar qilib turgan barcha o‘quvchilarimizga minnatdorchilik bildiramiz!
Telegram’dagi @ToshqinDaryo kanalida tatbiq etgan loyihalarimizdan biri — ovozli xabarlardir. Unda “Daryo” internet-nashrida e’lon qilingan yangiliklar ovozli tarzda berib boriladi. Matnlar qayta-qayta tekshirilgani va filmlardagi sahna ko‘rinishlari bir necha dublda suratga olingani kabi, ovozli xabarlar ham ko‘pincha bir necha “dubl”dan so‘ng tayyor bo‘ladi (kechagi xatolik ham aynan “xato birinchi dubl” edi).
Xato ovozli xabar uchun bizni tanqid qilganlar ham bo‘ldi — biz bu xatolik uchun yana bir bor barcha mushtariylarimizdan uzr so‘raymiz. Ayni vaqtda, uni eshitib kayfiyati ko‘tarilganlar ham kam emasligini bildik. Tahririyatda ham ovozli xabarlarning “o‘xshamagan dubllari”ni qayta tinglab, kayfiyatni ko‘tarish odatimiz yo‘q emas. Jeki Chan filmlari oxirida titrlar bilan yonma-yon ko‘rsatiladigan o‘xshamagan dubllar namoyishi uslubidagi @ToshqinDaryo’ning “o‘xshamagan ovozli xabarlari jamlanmasi” sizga ham xush kayfiyat ulashishiga umid qilamiz.
“Daryo”ni o‘qing, @ToshqinDaryo’da ovozli xabarlarni tinglang! Yangiliklar daryosidan uzoqlashmang!
Izoh (0)