2014 йил мартида йўқолиб қолган Малайзиянинг Boeing самолётини қидириш ишлари январда якунланади, деб ёзади «ТАСС» Австралиянинг транспортдаги хавфсизлик бюросига таяниб.
Ҳинд океанида қидирувларни давом эттираётган Fugro Equator кемаси иши якунига етмоқда ва агар об-ҳаво шароитлари имкон яратса, яқин келажакда тугалланади.
Қарийб уч йил давом этган қидирув чоғида Австралиядан ғарбдаги 120 минг квадрат километр майдонли ҳудуд текшириб чиқилди, аммо ғойиб бўлган авиалайнернинг ҳеч қандай изи топилмади.
Ўтган ҳафта Малайзия транспорт вазири қидирув ишлари тахминан икки ҳафтадан сўнг тугашини айтган эди. Бундан ташқари, у Австралия, Хитой ва Малайзия вакиллари учрашиб, кейинги қадамларни аниқлаштириб олишини маълум қилди.
Malaysia Airlines’га қарашли Boeing 777-200ER самолёти 2014 йил 8 март куни Куала-Лумпурдан Пекинга парвоз этаётиб, радарлардан йўқолиб қолган. У Малайзия ва Вьетнам чегарасини кесиб ўтганидан кейин бир неча дақиқа вақт ўтгач, алоқа узилган. Бевосита ғойиб бўлишидан аввал ундан олинган хабарда бирор муаммо ҳақида гап ҳам бўлмаган. Самолёт бортида 12 нафар экипаж аъзолари билан бирга жами 239 киши бўлган.
Изоҳ (0)