Халқаро футбол уюшмаси ФИФА 2026 йилги жаҳон чемпионатидан бошлаб унинг бир неча ўн йиллардан буён давом этиб келаётган форматини ўзгартириши ҳақида расман маълум қилди. Унга кўра, ҳар тўрт йилликнинг энг йирик футбол турнирида 32 та эмас, балки 48 та терма жамоа ғолиблик учун кураш олиб боради.
Ўз-ўзидан конфередациялар учун ажратиладиган квоталар сони ҳам 2026 йилдан бошлаб ўзгаради. Режага кўра, Европа қитъасининг 16 та терма жамоаси жаҳон чемпионатида иштирок этади. Бу кўрсаткич Африкада 9,5 тани, Осиёда 8,5 тани, Жанубий ва Шимолий Америкада 6,5 тани ташкил қилади. Океания минтақасига 1 та алоҳида жой ажратилади.
48 та терма жамоани 16 та гуруҳга бўлиш режаси ишлаб чиқилган. Шунда ҳар бир гуруҳда 3 тадан терма рақобат олиб боради ва уларнинг 2 таси навбатдаги босқичга йўлланма олади. Бу қарор ФИФА иқтисодиётига янада фойдали бўлиши айтилган.
2018 йилги мундиалга Россия, 2022 йилдагисига эса Қатар мезбонлик қилади. 2026 йилги жаҳон чемпионати қаерда ўтиши масаласи ҳал этилмаган. Айни вақтда Ҳиндистон ва Хитой бу йўлда қўшма ариза беришни режалаштирмоқда. Шунингдек, Эквадор, Боливия, Перу ва Парагвай мамлакатлари ҳам 2026 йилги ЖЧни биргаликда ўтказиш масаласини кўриб чиқмоқда. Канада ва Янги Зеландия ҳам мундиални ўзида қабул қилишни истайди.
Изоҳ (0)