Исроил бош вазири Биньямин Нетаньяху Янги Зеландия ташқи ишлар вазири Маррей Маккаллини манзилгоҳлар бўйича Исроилга қарши резолюцияга овоз бериш «уруш эълон қилиш» сифатида қабул қилиниши ҳақида огоҳлантирган, дея хабар бермоқда «ТАСС».
Яҳудий давлати ҳукумати раҳбари дипломатга БМТда овоз бериш бошланишидан бир неча соат аввал қўнғироқ қилган. Haaretz газетаси Ғарб дипломатик тузилмаларига таяниб ёзишича, суҳбат «кескин» бўлган. «Агар сиз ушбу можароли қарорни қўллаб-қувватласангиз, биз буни уруш эълон қилиш деб қабул қиламиз. Биз муносабатларни узиб, Янги Зеландиядан элчиларни чақириб оламиз», — деган Нетаньяху.
Суҳбат баланд оҳангда кечганига қарамай, Маккалли резолюция мамлакат сиёсатига мос келиши ва шу сабабли қўллаб-қувватланишини таъкидлаган.
БМТ Хавфсизлик Кенгаши 23 декабрь куни кўпчилик овоз билан қабул қилган резолюция Исроилдан Фаластиннинг оккупация қилинган ҳудудларида манзилгоҳлар қуриб, у ерга яҳудийларни кўчириш хатти-ҳаракатларини зудлик билан тўхтатиш талаб қилади.
Кейинроқ Исроил бош вазири Биньямин Нетаньяху БМТ Хавфсизлик Кенгашига аъзо 12 мамлакат элчихоналари билан алоқаларни музлатиб қўйишга кўрсатма берди. Булар Исроилни Фаластиннинг босиб олинган ерларида яҳудий манзилгоҳларини қуришни тўхтатишга чақирувчи резолюцияни маъқуллаган Буюк Британия, Франция, Россия, Хитой, Япония, Украина, Ангола, Миср, Уругвай, Испания, Сенегал ва Янги Зеландиядир.
Изоҳ (0)