Корея халқаро ҳамкорлик агентлиги (KOICA) 2017—2019 йиллар учун янги «Ўзбекистон Республикаси давлат секторига инновацияларни жорий қилиш учун Давлат бошқаруви академияси салоҳиятини яхшилаш» лойиҳасини тайёрлади, дея хабар бермоқда UZ24.
27 декабрь куни KOICA Ўзбекистон Президенти ҳузуридаги Давлат бошқаруви академияси билан уни амалга ошириш учун муҳокамалар протоколини имзолади.
Лойиҳа доирасида Ўзбекистонда ходимларни бошқариш сиёсати ва давлат хизматчиларини тайёрлаш тизими бўйича консультациялар бериш, Давлат бошқаруви академиясининг таълим салоҳиятини мустаҳкамлаш, шунингдек, давлат хизматчилари, шу жумладан, Академия талабалари, профессор-ўқитувчилари, ўқитувчилари ва ходимлари салоҳиятини мустаҳкамлаш режалаштирилмоқда.
KOICA ва Давлат бошқаруви академияси Ўзбекистондаги давлат хизматчилари учун кадрларни тайёрлаш тизимининг бош режасини ишлаб чиқиши, шунингдек, «Кадрларни ривожлантириш» мавзусида Корея—Ўзбекистон жамоатчилик анжуманини ўтказиши кутилмоқда.
Бундан ташқари, янги ўқув дастурлари ва ўқитиш услублари, ўқитувчилар ва ходимлар учун семинарлар ишлаб чиқилади. Давлат бошқаруви академияси талабалари, ўқитувчилари ва ходимлари, шунингдек, Жанубий Кореяда ихтисослаштирилган таълим курсларида ўқийди.
Изоҳ (0)