Физиклар уч атом қалинликдаги симларни ишлаб чиқди

Стэнфорд университети мутахассислари дунёдаги энг ингичка симларни ишлаб чиқди, деб ёзади «Hi-tech.mail.ru». Уларнинг қалинлиги бор-йўғи уч атом, узунлиги бир неча миллиметрга тенг.

Симларни яратишда мисдан фойдаланилди. Наноўтказгичлар мустақил тарзда йиғилди, деса ҳам бўлади. Бунинг учун ёрдамчи материал сифатида олтингугуртни қўллашди.

Бундан ташқари, симларни ишлаб чиқаришда олмосларни ишга солишди. Ҳажми молекулага тенг бўлган олмос бўлакларини олтингугурт атомларига бириктиришди. Симларни ўстириш учун аралашмани яратишда Арканзас штатидан келтирилган махсус тозаланган нефтдан фойдаланишди. Гап шундаки, сайёрадаги нефтларнинг барчаси таркиби бўйича ўзига хос бўлиб, олмос аралашмаси эса айнан Арканзас нефтида мавжуд.

Натижада олимлар қалинлиги уч атомга тенг, олмос билан қопланган мис симларга эга бўлди. Технологияни реал микросхемаларда қўллаш мумкин, бу уларнинг ҳажмини бир неча баробар кичрайтириш имконини беради. Олмос билан қопланган мис симлар қуёш нуридан электр энергияси олиш имкониятини ҳам тақдим этади.

Энди олимлар симлар асосида мис варақлар ёки пластиналар яратмоқчи. Бундан ташқари, мутахассислар пўлат, рух, кадмий, олтин ва бошқа металлардан ҳам наносимлар яратишга уриниб кўради.