Stenford universiteti mutaxassislari dunyodagi eng ingichka simlarni ishlab chiqdi, deb yozadi “Hi-tech.mail.ru”. Ularning qalinligi bor-yo‘g‘i uch atom, uzunligi bir necha millimetrga teng.
Simlarni yaratishda misdan foydalanildi. Nanoo‘tkazgichlar mustaqil tarzda yig‘ildi, desa ham bo‘ladi. Buning uchun yordamchi material sifatida oltingugurtni qo‘llashdi.
Bundan tashqari, simlarni ishlab chiqarishda olmoslarni ishga solishdi. Hajmi molekulaga teng bo‘lgan olmos bo‘laklarini oltingugurt atomlariga biriktirishdi. Simlarni o‘stirish uchun aralashmani yaratishda Arkanzas shtatidan keltirilgan maxsus tozalangan neftdan foydalanishdi. Gap shundaki, sayyoradagi neftlarning barchasi tarkibi bo‘yicha o‘ziga xos bo‘lib, olmos aralashmasi esa aynan Arkanzas neftida mavjud.
Natijada olimlar qalinligi uch atomga teng, olmos bilan qoplangan mis simlarga ega bo‘ldi. Texnologiyani real mikrosxemalarda qo‘llash mumkin, bu ularning hajmini bir necha barobar kichraytirish imkonini beradi. Olmos bilan qoplangan mis simlar quyosh nuridan elektr energiyasi olish imkoniyatini ham taqdim etadi.
Endi olimlar simlar asosida mis varaqlar yoki plastinalar yaratmoqchi. Bundan tashqari, mutaxassislar po‘lat, rux, kadmiy, oltin va boshqa metallardan ham nanosimlar yaratishga urinib ko‘radi.
Izoh (0)