Қиш фаслида энг фойдали бўлган озиқ-овқат маҳсулотлари

Қиш фаслида рационни қандай маҳсулотлар билан тўлдирган маъқул?

Наъматак

Бу ўсимлик витамин ва минераллар хазинаси ҳисобланади. Унинг таркиби кальций, калий, темир ва марганец моддаларига жуда бой. Наъматак шарбати ёки дамламаси иммунитетни оширади ва модда алмашинувини яхшилайди. Шунингдек, у қаришга тўсқинлик қилувчи кучли антиоксидант ҳисобланади.

Хурмо

Хурмода ичаклар фаолиятига ва токсинларни чиқаришга ёрдам берувчи клетчаткалар (олмадагидан икки баравар) кўп. Хурмо ичак микрофлораларини яхшилайди ва иммунитетни кўтаради. Хурмода юрак учун фойдали бўлган моддалар – калий, магний, кальций ва анемияни даволовчи – мис, темир, марганец моддалари мавжуд.

Қуруқ мевалар

Мевалар қуритилганда деярли ҳамма фойдали моддалар сақланиб қолади. Қуруқ мевалар витамин ва минералларга бой бўлиб, айниқса, баргак, анжир ва олхўри қоқилар овқат ҳазм қилиш жараёни учун жуда фойдали ҳисобланади.

Қизил лавлаги

Лавлаги клетчатка, органик кислоталар ёрдамида ичак фаолиятини яхшилайди ва уни зарарли бактериялардан тозалайди. У жигарнинг ёғлардан холос бўлишига, томирларни тозалашга ва қон ишлаб чиқаришга ёрдам беради. Қизил лавлагини пишириш жараёнида фойдали хусусиятлари бироз камаяди.