Осиё клубларининг трансфер бозоридаги рекордлари. «Челси»дан харид қилинган Оскар ҳозирча пешқадам

Осиё Футбол Конфедерацияси расмий сайти трансфер бозорида чегара билмаётган Хитой клубларига эътибор қаратишни лозим деб топди.

2016 йилги мавсумнинг ўзида Хитой клублари 6 та йирик трансферни амалга оширган. Ва уларнинг ҳар бири рекордни янгилайверган.

БААнинг «Ал-Аҳли» клуби 2015 йилги мавсумдаги икки хариди билан кўпчиликни ҳайрон қолдирганди. Аввалига Эвертон Рибейро Бразилиянинг «Крузейро» жамоасидан 15 миллион еврога сотиб олинган. Кейинроқ эса «Ал-Аҳли» Мусса Соу учун «Фенербаҳче» ҳисоб-рақамига 16 миллион ўтказиб берган.

Жорий йил бошида Хитойнинг «Шанхай SIPG» жамоаси Элкесенни ўз сафига қўшиб олди. Бунинг учун клуб мамлакатнинг бошқа бир жамоаси «Гуанжоу Эвергранд»га 18,5 миллион евро тўлади.

Бироз ўтиб «Жиангсу Сунинг» рекордни янгилади. Рамирес «Челси»дан 28 миллион евро эвазига сотиб олинди.

Луис Фелипе Сколари бошчилик қиладиган «Гуанжоу Эвергранд» клуби «Атлетико» ҳисоб рақамига 42 миллион евро ўтказиб, кўпчиликни ажаблантирди. Мадрид клуби Жексон Мартинесни айнан шу нархга пуллаб юборди.

«Жиангсу Сунинг» буни кўриб, фақатгина Рамирес билан чекланишни истамади ва Алекс Тейшерага оғиз солди. «Шахтёр» эса ўзи сўраган 50 миллион еврони санаб олди.

Ва ниҳоят сўнгги икки рекорд «Шанхай SIPG» томонидан ўрнатилди. Халк учун «Зенит» ғазнаси 55,8 миллионга бойитилган бўлса, Лондоннинг «Челси» клуб Оскар учун бир йўла 70,5 миллион сўради ва мақсадига етишди.

Осиё клубларидан ҳеч бири 2016 йилга келиб хитойликлардан ўзиб кета олмаяпти.