Osiyo klublarining transfer bozoridagi rekordlari. “Chelsi”dan xarid qilingan Oskar hozircha peshqadam

Osiyo Futbol Konfederatsiyasi rasmiy sayti transfer bozorida chegara bilmayotgan Xitoy klublariga e’tibor qaratishni lozim deb topdi.

2016-yilgi mavsumning o‘zida Xitoy klublari 6 ta yirik transferni amalga oshirgan. Va ularning har biri rekordni yangilayvergan.

BAAning “Al-Ahli” klubi 2015-yilgi mavsumdagi ikki xaridi bilan ko‘pchilikni hayron qoldirgandi. Avvaliga Everton Ribeyro Braziliyaning “Kruzeyro” jamoasidan 15 million yevroga sotib olingan. Keyinroq esa “Al-Ahli” Mussa Sou uchun “Fenerbahche” hisob-raqamiga 16 million o‘tkazib bergan.

Joriy yil boshida Xitoyning “Shanxay SIPG” jamoasi Elkesenni o‘z safiga qo‘shib oldi. Buning uchun klub mamlakatning boshqa bir jamoasi “Guanjou Evergrand”ga 18,5 million yevro to‘ladi.

Biroz o‘tib “Jiangsu Suning” rekordni yangiladi. Ramires “Chelsi”dan 28 million yevro evaziga sotib olindi.

Luis Felipe Skolari boshchilik qiladigan “Guanjou Evergrand” klubi “Atletiko” hisob raqamiga 42 million yevro o‘tkazib, ko‘pchilikni ajablantirdi. Madrid klubi Jekson Martinesni aynan shu narxga pullab yubordi.

“Jiangsu Suning” buni ko‘rib, faqatgina Ramires bilan cheklanishni istamadi va Aleks Teysheraga og‘iz soldi. “Shaxtyor” esa o‘zi so‘ragan 50 million yevroni sanab oldi.

Va nihoyat so‘nggi ikki rekord “Shanxay SIPG” tomonidan o‘rnatildi. Xalk uchun “Zenit” g‘aznasi 55,8 millionga boyitilgan bo‘lsa, Londonning “Chelsi” klub Oskar uchun bir yo‘la 70,5 million so‘radi va maqsadiga yetishdi.

Osiyo klublaridan hech biri 2016-yilga kelib xitoyliklardan o‘zib keta olmayapti.